“Тадбиркорликни ривожлантириш компанияси” АЖ InfinBank акциядорига айланди
Ўзбекистондаги хусусий тижорат банкларидан бири ҳисобланган Invest Finance Bank (InfinBank) АЖнинг 15% акцияларини “Тадбиркорликни ривожлантириш компанияси” сотиб олди.
Корпоратив ахборот ягона порталидан маълум бўлишича, “Тадбиркорликни ривожлантириш компанияси” АЖ Invest Finance Bank (InfinBank) АЖнинг 15% акцияларини сотиб олган.
Шунингдек, InfinBank расмий веб-сайтидаги акциядорлар тузилмасида ҳам “Тадбиркорликни ривожлантириш компанияси” АЖ банк акциядори сифатида кўрсатилган.
Шундай қилиб, бугунги кунда InfinBank АЖнинг акциядорлари қуйидагиларни ташкил этмоқда:
- Маматджанов Фарход Фахритдинович
- Абдусамадов Парвиз Махсудович
- “Тадбиркорликни ривожлантириш компанияси” АЖ
- “Azia Trans Terminal” МЧЖ
- “Prestij Rielt” МЧЖ ҚК
Маълумот учун, 2023 йил 10 ноябрдаги “Кичик ва ўрта бизнесни молиявий қўллаб-қувватлаш тизимини такомиллаштириш чора-тадбирлари тўғрисида” Президент фармони билан Тадбиркорлик фаолиятини қўллаб-қувватлаш давлат жамғармаси “Тадбиркорликни ривожлантириш компанияси” сифатида қайта ташкил этилган. Компаниянинг таъсисчиси Иқтисодиёт ва молия вазирлиги ҳисобланади.
