Сохта ходимлар ва ҳуқуқий таҳдидлар — Марказий банк рақамли фирибгарлик схемаларидан огоҳлантирмоқда
Марказий банк фуқароларни ўзини ташкилот ходими сифатида таништириб, ҳуқуқий таҳдидлар орқали шахсий маълумотларни қўлга киритишга уринаётган фирибгарлар ҳақида огоҳлантирмоқда. Янги схемаларда телефон ва Telegram орқали чалғитувчи усуллар қўлланилмоқда.
Ўзбекистон Республикаси Марказий банки рақамли фирибгарликнинг янги турлари ҳақида фуқароларни огоҳлантириб, сўнгги вақтларда фирибгарлар тобора мураккаб ва чалғитувчи усуллардан фойдаланаётгани ҳақида хабар берди.
Хусусан, фирибгарлар ўзларини уяли алоқа операторининг “ходими” сифатида таништириб, фуқароларга қўнғироқ қилади ва телефон рақамидан фойдаланиш бўйича тузилган шартномани “узайтириш” баҳонасида бир қанча саволлар беради. Бу орқали улар фуқаронинг ишончини қозонишга ҳаракат қилади.
Орадан бироз вақт ўтгач, Telegram мессенжери орқали Марказий банкнинг рамзий белгиларини акс эттирган сохта профиль орқали яна мурожаат қилишади. Унда фуқаронинг банк ва тўлов тизимларидаги иловалари орқали кимдир рухсатсиз киришга урингани, ҳаттоки ҳали якунланмаган кредит амалиёти борлиги ҳақида хабар юборилади. Бу хабарларда таҳдид унсурлари ҳам мавжуд — масалан, “агар кўрсатмалар бажарилмаса, фуқаро жиноий жавобгарликка тортилиши мумкин”, деган иборалар келтирилади.
Фирибгарлар бу таҳдидларни янада ишончли қилиш учун очиқ манбалардан, масалан, www.lex.uz каби сайтлардан олинган Ўзбекистон Республикаси Жиноят-процессуал кодексининг электрон файлини хабар билан бирга юборишади.
Марказий банк қайд этишича, агар фуқаро бундай ёлғонларга ишониб, фирибгарларга шахсий маълумотларини тақдим этса ёки уларнинг кўрсатмаларига амал қилса, банк картасидаги пуллардан айрилиши мумкин.
Шу муносабат билан Марказий банк фуқароларга яна бир бор мурожаат қилиб, эҳтиёт бўлишга ва шубҳали хабарлар, қўнғироқлар ёки мессенжердаги мурожаатларга ишонмасликка чақирмоқда. Марказий банк бу каби ҳаракатларга ҳеч қандай алоқаси йўқлигини расман билдирган.
