Сўмдаги омонатлар бўйича ставкалар сўнгги йиллардаги энг паст даражага тушди

Ўзбекистонда банк депозитлари бўйича фоизлар пасайишда давом этмоқда. Апрель якунларига кўра, миллий валютадаги муддатли депозитларнинг ўртача ставкаси 17,4 фоизни ташкил этди. Бу 2022 йил февралидан буён кузатилган энг паст даражадир.

Бир ой аввал мазкур кўрсаткич 18,1 фоиз эди. Йиллик таққослаганда эса депозитлар бўйича ўртача даромадлилик 2,1 фоиз бандга камайган.

Пасайиш айниқса бир йилгача бўлган депозитларда кучлироқ кўринди. Ушбу сегментда ставка 15 фоизгача тушиб, март ойига нисбатан 1,3 фоиз бандга камайди. Бир йилдан ортиқ муддатли депозитлар бўйича эса ўртача фоиз 18,1 фоизни ташкил этди.

Аҳоли омонатлари 5 йиллик минимумга тушди

Жисмоний шахсларнинг сўмдаги муддатли омонатлари бўйича ўртача ставка апрелда 19,9 фоизга тушди. Бу 2021 йил сентябридан бери энг паст кўрсаткич бўлди.

Шу тариқа аҳоли депозитлари бўйича ўртача фоиз қарийб беш йил ичида илк бор 20 фоизлик чегарадан пастга тушди. Март ойида ушбу кўрсаткич 20,5 фоизни ташкил этган эди.

Қисқа муддатли аҳоли омонатлари бўйича ставка 18,5 фоизгача камайди. Бу бир ой ичида 2 фоиз бандлик пасайиш демакдир. Бир йилдан ортиқ муддатга жойлаштирилган маблағлар бўйича эса банклар ўртача 20,1 фоиз таклиф қилмоқда.

Ҳақиқий даромадлилик нега юқори қолмоқда?

Номинал фоизлар пасайган бўлса-да, аҳоли омонатларининг реал даромадлилиги юқори даражада сақланмоқда.

Апрелда жисмоний шахсларнинг сўмдаги депозитлари бўйича реал ставка 8,4 фоизни ташкил этди. Бу март ойидагидан атиги 0,1 фоиз бандга кам, бироқ бир йил аввалгидан 1,9 фоиз бандга юқори.

Бунга инфляцион кутилмаларнинг камайиши таъсир қилган. Аҳолининг инфляция бўйича кутишлари 2025 йил апрелидаги 14,2 фоиздан 10,6 фоизгача пасайган.

Натижада омонатлар бўйича номинал фоиз камайганига қарамай, кутилаётган инфляция чиқариб ташлангандан кейинги даромад ошган.

Корпоратив депозитлар арзонлашмоқда

Бизнес маблағлари бўйича ставкалар аҳоли омонатларига қараганда анча паст шаклланган. Апрелда юридик шахсларнинг сўмдаги муддатли депозитлари бўйича ўртача фоиз 15 фоизни ташкил этди.

Бир йилгача бўлган корпоратив депозитлар бўйича ставка 13,9 фоизга тушди. Бир йилдан ортиқ муддатли депозитларда эса даромадлилик 15,6 фоизни ташкил қилди.

Йиллик ҳисобда бизнес депозитлари бўйича ўртача ставка 2,4 фоиз бандга камайган. Энг катта пасайиш қисқа муддатли сегментда кузатилиб, бу ерда фоизлар бир йил ичида 3,7 фоиз бандга тушган.

Бизнес депозитлари бўйича реал ставка 4,3 фоизни ташкил этди. Бу кўрсаткич ойлик ҳисобда бироз камайган, йиллик ҳисобда эса деярли ўзгармаган.

Чет эл валютасидаги депозитлар

Чет эл валютасидаги депозитлар бўйича умумий ставка апрелда 4,1 фоизга етди. Март ойига нисбатан бу 0,6 фоиз бандлик ўсишни англатади.

Бироқ ўсиш барча сегментларда кузатилмади. Бир йилгача бўлган валюта депозитлари бўйича ставка 2,2 фоизгача пасайган. Аксинча, бир йилдан ортиқ муддатли депозитлар бўйича фоиз 5,2 фоизга кўтарилди.

Аҳолининг валютадаги омонатлари бўйича ўртача ставка 4,9 фоизни ташкил этди. Бизнес ҳисобварақлари бўйича эса ушбу кўрсаткич 2,8 фоизга тенг бўлди.