Сиёсий хатарлар фонида олтин нархи 4 700 долларгача ошиши мумкин — UBS
UBS банки 12 ой ичида олтиннинг асосий нархини 4 200 доллар деб баҳоламоқда. Аммо сиёсий кескинлик ва хатарлар кучайса, бу кўрсаткич 4 700 долларгача чиқиши мумкин.
UBS банки таҳлилчиларига кўра, сиёсий ва молиявий хавфлар ортиб бораётгани сабабли олтин нархи бир унция учун 4 700 долларгача кўтарилиши мумкин. Ҳатто АҚШ ҳукумати фаолиятининг тўхташи якунланса ҳам, хавфсиз активларга талаб юқори бўлиб қолади.
Банк мутахассислари олтин нархининг сўнгги пасайишини вақтинчалик пауза деб атади. Уларнинг фикрича, АҚШдаги сиёсий ноаниқликлар, бюджет бўйича келишмовчиликлар ва Олий суд қарорлари атрофидаги муаммолар олтин нархини қўллаб-қувватлайди.
UBS шунингдек, дунё бўйлаб давлат қарзининг ортиши, валюталарнинг қадрсизланиш хавфи ва марказий банкларнинг олтин харидлари ошгани ҳам талабни кучайтираётганини билдирди. Жаҳон Олтин Кенгаши маълумотига кўра, бу йил олтин бозори 2011 йилдан бери энг юқори талабни қайд этмоқда.
Банк Федерал Резерв 2026 йил бошигача икки марта фоиз ставкасини туширади, деб кутмоқда. Бу эса долларнинг қадрсизланишига ва олтин нархининг ўсишига олиб келади.
Умуман, UBS олтинни хавфсиз инвестиция воситаси деб билади. Улар 12 ой ичида олтин нархи 4 200 долларга етишини, сиёсий ва молиявий хавфлар ошса эса 4 700 долларгача чиқишини тахмин қилмоқда.
Аввалроқ Bank of America 2026 йилда олтин нархи бир унция учун 5 000 долларга, кумуш эса 65 долларга етишини прогноз қилаётгани хабар қилинган еди.
