Сем Альтман сунъий интеллект ҳақида катта башоратини билдирди
Унга кўра, 2030 йилга келиб AI инсондан ақллироқ даражага етади, иқтисодий вазифаларнинг катта қисмини бажаради ва одамлар ўзи мустақил қила олмайдиган илмий кашфиётларни амалга оширади.
OpenAI асосчиси Сем Альтман фикрича, сунъий интеллект 2030 йилгача инсон қила олмайдиган ишларни бажариш даражасига етади. Бу ҳақда Fortune нашри хабар берди.
Унга кўра, компания яратган энг сўнгги модель аллақачон Алтманнинг ўзидан ақллироқ ва 2026 йилдан бошлаб янги моделлар кутилмаган имкониятларни очиб бериши мумкин. Яқин келажакда эса иқтисодий вазифаларнинг 30–40 фоизи AI томонидан бажарилиши эҳтимолдан холи эмас.
Альтман бошқа технология раҳбарларига қараганда эҳтиёткорроқ фикр билдирди. Масалан, Anthropic раҳбари Дарио Амодеи 2027 йилгача AI деярли барча соҳада одамдан устун бўлишини айтган бўлса, Элон Муск келаси йилда сунъий интеллект энг ақлли инсондан ҳам устун чиқишини таъкидлаган.
Шу билан бирга, Альтман AI қанчалик кучли бўлмасин, одамлар барибир инсонлар нима қилаётганига қизиқишда давом этишини ва технологиядан қандай фойдаланишни ҳам инсонларнинг ўзи белгилашини таъкидлади.
Бугунги кунда ChatGPT каби хизматлар улкан энергия ҳамда катта маълумот марказларини талаб қилмоқда. OpenAI GPT-5’дан ҳам кучли моделларни ишлаб чиққан бўлса-да, зарур инфратузилма етишмаслиги сабабли уларни оммага тақдим эта олмаяпти. Шу боис компания Oracle ва SoftBank билан ҳамкорликда Техасда 800 гектарлик маълумотлар марказини қурмоқда. Яқин йилларда АҚШ бўйлаб яна бешта марказ барпо этилиши ҳам режалаштирилган.
Альтман ишонч билан айтишича, яқин орада сунъий интеллект одамлар мустақил амалга ошира олмайдиган илмий кашфиётларни яратишга қодир бўлади. Ана шунда уни бемалол суперинтеллект деб аташ мумкин бўлади.
