Samsung илк учта экранли смартфони — Galaxy Z TriFold’ни тақдим этди
10 дюймли катта дисплей, мустаҳкамланган буклаш механизми ва 5 600 мАч сиғимли батарея билан жиҳозланган қурилма 12 декабрда Кореяда сотувга чиқарилади. Смартфонда флагман даражадаги 200 мегапикселли камера қўлланилган бўлиб, тўлиқ ёйилганда унинг қалинлиги атиги 3,9 миллиметрни ташкил этади.
Samsung ўзининг илк уч экранли букланадиган смартфони — Galaxy Z TriFold’ни тақдим этди. Қурилма иккита букланиш чизиғига эга бўлиб, очилганда 10 дюймли катта дисплей, ёпилганда эса 6,5 дюймли ташқи экран билан ишлайди. Samsung янги конструктсияда букланиш излари сезиларли даражада камайтирилганини таъкидламоқда.
Қурилма ичкарига букланадиган дизайнга эга бўлиб, махсус механизм нотўғри буклаш ҳолатида фойдаланувчини огоҳлантирувчи сигнал беради. Асосий механизм Titanium Armor FlexHinge шарнир тизимига асосланган. Икки рельсли тузилма билан ишлайдиган турли ўлчамдаги иккита шарнир силлиқ, барқарор ва мустаҳкам букланишни таъминлайди. Очилган ҳолатда қурилманинг қалинлиги 3,9–4,2 мм оралиғидадир. Бу Samsung чиқарган энг юпқа Смартфон.
Galaxy Z TriFold уч бўлмали, 5 600 мАч сиғимли аккумулятор билан жиҳозланган. Бу — Samsung смартфонларида шу пайтгача қўлланилган энг катта батарея. Камера тизими ҳам флагман даражасида: 200 MP асосий камера, 12 MP ултра-кенг бурчакли модуль ва 3х оптик зумга эга 10 MP телефото камера. Асосий ва ташқи экранларда иккита 10 MP селфи камера ўрнатилган.
Янги модель кўп вазифали ишлаш учун оптималлаштирилган. Фойдаланувчилар бир вақтнинг ўзида учта иловани ёнма-ён ишлата олиши, ойналарни ихтиёрий шаклда жойлаштириши ва медиа контентни тўлиқ экранда томоша қилиши мумкин. Қурилмага мустақил Samsung DeX режими қўшилган бўлиб, у бир вақтнинг ўзида бешта иловани ишга туширишни, тўрттагача ишчи майдон билан ишлашни ва катта экранлар учун мослаштирилган иловалардан фойдаланишни қўллаб-қувватлайди. Гооглеънинг Gemini Live хизмати ҳам TriFold экранига мослаштирилган.
Galaxy Z TriFold 12 декабрь куни Кореяда сотувга чиқарилади. Кейинчалик Хитой, Тайван, Сингапур ва БАА бозорларига ҳам кириши режалаштирилган. АҚШда смартфон 2026 йилнинг биринчи чорагида тақдим этилади. Нарх ҳали ошкор қилинмаган.
