Рақобат қўмитаси бир неча банклар ва микромолия ташкилотига нисбатан иш очди
Ташкилотлар реклама қонунчилигини бузишгани айтилмоқда.
Рақобатни ривожлантириш ва истеъмолчилар ҳуқуқларини ҳимоя қилиш қўмитаси томонидан 2 та банк ва 2 та микромолия ташкилотига нисбатан иш қўзғатилди. Бу ҳақида қўмита расмий саҳифаларидан бирида хабар берилди.
Қўмита ваколат доирасида оммавий ахборот воситаларида — телевидение, радио, босма нашрлар, интернет ва ижтимоий тармоқларда жойлаштирилган реклама ахборотларини таҳлил қилиш ва уларнинг реклама ҳамда истеъмолчилар ҳуқуқларини ҳимоя қилиш тўғрисидаги қонун ҳужжатларига мувофиқлигини текшириб бормоқда.
Ўтказилган мониторинг натижаларига кўра, “Реклама тўғрисида”ги Қонун талабларини бузиш аломатлари аниқланган. Шу сабабли махсус комиссия томонидан қуйидаги молия ташкилотларига нисбатан иш қўзғатилди:
Банклар: “Tenge Bank” АТБ, “Agrobank” АТБ
Микромолия ташкилотлари: “Ipoteka Xizmati Group” МЧЖ, “Tasfinance Mikromoliya Tashkiloti” МЧЖ
Қўмита мазкур ишлар белгиланган тартибда кўриб чиқилиши ва натижалар бўйича қўшимча маълумот тақдим этилишини маълум қилди.
