Пулнинг ҳақиқий эканлигини қандай қилиб текширса бўлади?
Банкнотадаги махсус белгилар пулнинг ҳақиқий ёки йўқлигини текширишнинг энг асосий йўли бўлиб, бунинг 5 хил усули мавжуд.
Банкнота ҳақиқий ёки сохта эканлигини аниқлашнинг энг осон йўли — уни яқин атрофдаги банкка олиб боришдир. Бу усул энг осон ва ишончлиси ҳисобланса-да, бироқ жуда ноқулай. Шу сабабли қуйидаги усуллар орқали пулнинг сохта ёки йўқлигини текшириб олиш мумкин.
Ҳар бир банкнотада махсус элементлар мавжуд бўлади. Айнан ушбу элементлар ҳақида маълумотга эга бўлиш сизга фирибгарликдан ҳимояланишга ёрдам беради. Демак, одатда ҳақиқий пулда қуйидаги элементлар мавжуд бўлади.
Сув белгиси — пулни ёруғликка қарши қўйиб кўринг, унда банкнотанинг дизайнига мос тушадиган белги (масалан, портрет ёки рақамлар) кўринади. Сув белгиси аниқ ва нозик чизиқлар билан ҳосил қилинган бўлади.
Ҳимоя ипи — банкнотанинг ичидан ўтадиган юпқа металл ипни ёруғликка қарши қараганда кўришингиз мумкин. Баъзи пулларда ҳимоя ипида матн ёки рақам ёзилган бўлади.
Кўзга кўринмайдиган ёзувлар мавжудлиги — банкнотанинг юзасида лупа ёрдамида кўринадиган майда матнлар бўлиши мумкин. Бу ёзувлар ҳақиқий пулда жуда аниқ ва тоза бўлади.
Рельефли юзалар (қавариқ бўёқ) — айрим жойларда қўл билан ушлаб сезиладиган даражада бўртиб чиққан бўлади.
Қоғознинг ички тузилмасида портрет тасвирнинг орқа томонидан мавжудлиги — ушбу тасвир ёруғликка қарши қаратилиб текширилади.
Мазкур белгиларни аниқлаш орқали қалбаки пул сизнинг чўнтагингизга тушиб қолишидан ҳимояланишингиз мумкин. Агар қўлингиздаги пул ҳақиқий эканлигига шубҳангиз бўлса, уни исталган банкка бориб текшириб кўришни тавсия қиламиз.
