“Ўзмиллийбанк” АЖ 2022 йилда балансидан чиқарган Халқаро банк-молия маркази биносини қайтариб олди
Мазкур бинода ҳозирда American University of Technology олий таълим муассасаси фаолият юритмоқда.
2022 йилда Тошкент шаҳрининг Чилонзор тумани, Бешёғоч кўчаси, 1-уй манзилида жойлашган Халқаро банк-молия маркази биноси “Ўзмиллийбанк” АЖ тасарруфидан чиқарилиб, банкнинг шўба корхонаси ҳисобланган NBU Invest Group АЖга ўтказилган эди.
2025 йил 10 февраль куни Корпоратив маълумотлар ягона порталида эълон қилинган маълумотга кўра, ушбу бино яна “Ўзмиллийбанк” АЖ балансига қайта ўтказилди.
Шу муносабат билан, банк устав капитали қўшимча акциялар чиқариш орқали оширилади. Чиқариладиган акциялар қуйидагича:
- 6 082 852 дона оддий ҳужжатсиз шаклдаги акция;
- Ҳар бир акциянинг номинал қиймати – 1 000 сўм;
- Умумий қиймати – 6 082 852 000 сўм;
- Қўшимча 597,89 сўм кейинги чиқариш учун қолдирилади.
Акцияларни жойлаштириш тартиби ёпиқ обуна усулида амалга оширилади. Улар Ўзбекистон Республикаси Иқтисодиёт ва молия вазирлигига жойлаштирилади ҳамда акциялар биржадан ташқари бозорда “Ўзмиллийбанк” АЖ ҳамда Иқтисодиёт ва молия вазирлиги ўртасида тузиладиган олди-сотди шартномаси асосида жойлаштирилади. Ушбу шартнома Қимматли қоғозлар марказий депозитарийсида рўйхатдан ўтказилади.
Маълумот учун, ушбу бинода ҳозирда бир қатор хусусий ташкилотлар фаолият олиб бормоқда. Улар қаторига American University of Technology, Techno Soft ва Abstract IT Group компаниялари киради.
