“Ўзмиллийбанк” 2026 йилнинг I чорагида 603,2 млрд сўм соф фойда олди
Соф фойда кўрсаткичи ўтган йилнинг мос даврига нисбатан 28,9 фоизга ўсган.
“Ўзмиллийбанк” 2026 йилнинг I чораги якунлари бўйича молиявий ҳисоботини эълон қилди.
Унга кўра, компания январь-март ойларида 603 млрд 155 млн сўм соф фойда олди. Бу ўтган йилнинг мос даврига нисбатан 28,9 фоизга юқорироқдир. Маълумот учун, 2025 йил биринчи чорагида банк 467,9 млрд сўм соф фойда олган эди.
Ушбу даврда банкнинг жами фоизли даромадлари 4,7 трлн сўмга етди. Бу аввалги йил шу даврига нисбатан 15 фоизга юқори. Банкнинг фоизли харажатлари эса 2,5 трлн сўм бўлган.
Биринчи чоракда банк ходимларнинг иш ҳақи ва бошқа харажатларига 372,2 млрд сўм сарфлаган. Жами операцион харажатлар эса 673,1 млрд сўмни ташкил қилган. Операцион харажатлар ўтган йилнинг шу даврига нисбатан 26 фоизга ошган.
Давлат бюджетига тўланадиган даромад солиғи 22,5 млрд сўмни ташкил этиб, бу йўналишда 32,3 фоизлик ўсиш қайд этилган.
Аввалроқ Pinkod “Ўзсаноатқурилишбанк” I чоракда 550 млрд сўм соф фойда олгани ҳақида ёзган эди.
