Ўзбекистоннинг олтин экспорти ярим йилда 77 фоизга қисқарди

Ўзбекистон июнь ойида ҳам олтин экспортини амалга оширмади. Бу ҳақда Миллий статистика қўмитасининг ташқи савдо ҳисоботида маълум қилинди.

2026 йилнинг январь–июнь ойларида Ўзбекистоннинг ташқи савдо айланмаси 41 млрд долларни ташкил этди. Бу ўтган йилнинг мос даврига нисбатан 2,8 млрд доллар ёки 7,4 фоизга кўп.

Ярим йилликда экспорт ҳажми 15,9 млрд долларни, импорт эса 25,1 млрд долларни ташкил этди. Экспорт бир йил ичида 8,8 фоизга камайган бўлса, импорт 21 фоизга ошди.

Натижада мамлакат ташқи савдосидаги манфий сальдо 9,3 млрд долларга етди.

Умумий экспорт ҳажмининг камайиши, асосан, Ўзбекистон 2026 йилнинг биринчи ярмида фақат апрель ойида олтин экспорт қилгани билан боғлиқ.

Январь–июнь ойларида мамлакат 1 млрд 503,8 млн долларлик номонетар олтин сотган. Йилнинг дастлабки уч ойида олтин экспорти амалга оширилмаган, апрель ойида эса бирданига қарийб 1,5 млрд долларлик олтин хорижга чиқарилган.

Май ва июнь ойларида кўрсаткич ўзгармаган. Шу тариқа, ярим йилликдаги олтин экспортининг барчаси апрель ойига тўғри келган.

Таққослаш учун, 2025 йилнинг январь–июнь ойларида Ўзбекистон 6 млрд 492,1 млн долларлик олтин экспорт қилганди. Бир йил ичида кўрсаткич 4 млрд 988,3 млн доллар ёки 76,8 фоизга қисқарди.

Олтиннинг мамлакат жами экспортидаги улуши ҳам 37,3 фоиздан 9,5 фоизгача тушди.

Айни пайтда олтин ҳисобга олинмаганда, товарлар экспорти ўтган йилнинг мос даврига нисбатан 28,7 фоизга ошиб, 8,2 млрд долларни ташкил этди. Бу умумий экспортдаги пасайиш бошқа товарлар савдосининг қисқариши эмас, асосан олтин экспортининг кескин камайиши ҳисобига юз берганини кўрсатади.