Ўзбекистонда йиллик инфляция 10 фоиздан ошди

Статистика агентлиги маълумотларига кўра, истеъмол нархлари индекси (ИНИ) жорий йил февраль ойида 0,5 фоизга ошган. Йиллик инфляция эса 10,1 фоизга етган. Февраль ойидаги нархлар ўсиши 2023-йилдан бери энг юқори даражага етди.

Мазкур ойда озиқ-овқат нархлари 0,6 фоизга, йил бошидан бери эса 1,4 фоизга ошди. Йиллик инфляция эса сўнгги беш йилликдаги энг паст кўрсаткич – 2,9 фоизга етди.

Ўтган ойда сабзавот маҳсулотлари нархи 5,4 фоизга, гўшт маҳсулотлари эса 2,1 фоизга кўтарилди. Мол гўшти ўтган йил февралидан бери 18,5 фоизга (ойлик 2,8 фоиз) ошган бўлса, шу даврда қўй гўшти нархи 19,4 фоизга (ойлик 2,4 фоиз) юқорилади. Шу билан биргаликда, тухум нархи 12 фоизга, буғдой уни 5 фоизга, гуруч маҳсулоти 3,9 фоизга ва шакар нархи 1 фоизга арзонлади.

Мева-сабзавот маҳсулотлари орасида помидор нархи 30,1 фоизга, карам 17,8 фоизга ва бодринг нархи 17,3 фоизга юқорилади. Бу тоифада фақат банан нархи 3,6 фоизга арзонлагани кузатилди.

Кийим ва поябзал нархлари мос равишда 0,2 ва 0,3 фоизга қимматлашди. Йиллик инфляция кийим нархларида 5,3 фоизни, поябзалда эса 4,8 фоизни ташкил этди.

Ижара нархлари ой давомида 0,5 фоизга ошиб, йиллик нарх ошиши 13,5 фоизга етди. Электр, газ ва ёқилғининг бошқа турлари нархи 0,1 фоизга юқорилади. Бир йил ичида эса нархлар 68,5 фоизга кўтарилган. Жумладан:

• тармоқ газ нархи 129 фоизга,
• электр энергияси нархи 67 фоизга,
• марказий иситиш хизмати нархи 36,7 фоизга,
• иссиқ сув таъминоти нархи 32,7 фоизга ошди.

Пропан нархи февраль ойида 4,3 фоизга ошиб, йиллик қимматлашиш 11,3 фоизга етган. Бензин эса 0,4 фоизга ошиб, йиллик 2,9 фоизга етди.

Авиачипта нархлари февраль ойида кескин 22,4 фоизга ошди. Поезд хизматлари эса 4,5 фоизга қимматлаб, йиллик инфляция 18,6 фоизга етди.

Умумий ҳолатда пуллик хизматларга бўлган нархларнинг ойлик ўсиш суръати 2021-йилдан бери энг юқори даражага – 0,8 фоизга етди. Йиллик ўсиш суръати эса февраль ойида 27,1 фоизга етди.