Ўзбекистонда яна бир янги венчур фонд очилди
“Алоқабанк” томонидан устав капитали 70 млрд сўмни ташкил этувчи иккинчи венчур фонд давлат рўйхатидан ўтказилди.
28 январь куни “Алоқабанк” томонидан ALOQA VENTURES-2 номи билан янги венчур фонд (МЧЖ шаклида) рўйхатдан ўтказилди. Фонд раҳбари сифатида банкнинг биринчи венчур фонди раҳбари Ғайбуллоев Сухроб Одил ўғли кўрсатилган. Устав капитали 70 миллиард сўмни ташкил этувчи ушбу фонднинг 100% улуши “Алоқабанк”га тегишли бўлиб, банкнинг иккала венчур фонди бир хил юридик манзилда рўйхатдан ўтган.
“Алоқабанк”нинг биринчи венчур фонди — AloqaVentures МЧЖ 2021 йилда ташкил этилган бўлиб, шу кунгача 25 дан ортиқ стартапларга инвестиция киритган. Унинг портфелига MohirDev, Sello ва Royal Taxi каби стартаплар киради.
Венчур фонд ўзи нима ва қандай вазифани бажаради?
Венчур фонд — истиқболли, лекин катта хавфга эга бизнес лойиҳаларга инвестиция киритадиган махсус фонд ҳисобланади. У, асосан, инновацион стартапларни молиялаштириб, уларнинг тез ривожланишига ёрдам беради. Венчур капитал оддий кредитлардан фарқли равишда, юқори риск ва катта даромад олиш имкониятини ўз ичига олади.
Венчур фондларнинг асосий вазифалари қуйидагилардан иборат:
- Стартапларни қўллаб-қувватлаш. Янги бизнес ғояларга дастлабки босқичда сармоя киритиш орқали уларнинг ривожланишига кўмаклашади.
- Капитал жалб қилиш. Инвесторлар венчур фондлар орқали инновацион лойиҳаларга сармоя киритиб, истиқболли компанияларнинг улушига эга бўладилар.
- Рискларни бошқариш. Фондлар бир нечта стартапга инвестиция киритиб, улардан камида бир нечтаси муваффақиятга эришиши орқали фойда олишга ҳаракат қилади.
- Иқтисодий ўсишни рағбатлантириш. Янги технологиялар ва бизнес моделларни ривожлантириш орқали меҳнат бозорида янги имкониятлар яратади.
Ўзбекистонда венчур фондлар сони ортиб бормоқда
27 январь куни еттита йирик давлат банки – “Ўзмиллийбанк”, Халқ банки, “Асакабанк”, “Агробанк”, “Микрокредитбанк”, “Туронбанк” ва “Бизнесни ривожлантириш банки” томонидан United Ventures МЧЖ номи билан янги венчур фонд рўйхатдан ўтди. Мазкур фондда ҳар бир банк 14,28% улушга эга. Фонднинг устав капитали 525 миллиард сўмни ташкил этади.
Шунингдек, “Ўзсаноатқурилишбанк”нинг SQB Capital МЧЖ шўъба корхонаси томонидан 16 январь куни SQB Venture МЧЖ венчур фонди ташкил этилди. Унинг устав капитали 130 миллиард сўмни ташкил этади.
Бундан ташқари, IT Park томонидан IT Park Ventures фонди ишга туширилган бўлиб, унинг устав капитали 128 миллиард сўмни ташкил қилади.
Президент Шавкат Мирзиёевнинг 18 декабрь кунги топшириғига асосан, “Асакабанк” томонидан фармацевтика соҳасига ихтисослашган 10 миллион долларлик венчур фонд ташкил этилиши режалаштирилган.
Умуман олганда, сўнгги вақтларда венчур фондлар сонининг ортиши Президент Мирзиёев раислигида 16 декабрь куни бўлиб ўтган селекторда банкларга қўйилган вазифалар ижросини таъминлашга қаратилган. Ўша йиғилишда Президент ҳар бир давлат банки ўз венчур фондига эга бўлиши кераклигини таъкидлаган эди.
