Ўзбекистонда бир йил ичида электромобиль савдоси ҳажми 1,5 баробарга ошди
2026 йил февраль ойида Ўзбекистонда жами 84,2 мингта автомобиль сотилди. Шулардан 6,9 мингтаси электромобиль ҳисобига тўғри келади. Бу январь ойига нисбатан 14 фоизга, ўтган йилнинг шу даврига нисбатан эса 1,5 баробарга кўпроқдир.
2026 йилнинг февраль ойида Ўзбекистонда автомобиль бозори фаоллиги ошди. Ой давомида мамлакат бўйича жами 84,2 мингта автомобиль сотилди. Бу ҳақда Иқтисодий тадқиқотлар ва ислоҳотлар маркази маълум қилди.
Февраль ойидаги савдо ҳажми январь ойига нисбатан 2 фоизга, 2025 йил февралига нисбатан эса 6,4 фоизга ошган. Ҳудудлар кесимида йиллик энг катта ўсиш Самарқанд вилоятида (65%), Тошкент вилоятида (12%) ҳамда Сирдарё вилоятида (7,2%) қайд этилди.
Янги автомобиллар
Февраль ойида мамлакатда 24 мингта маҳаллий ишлаб чиқарилган автомобиль ишлаб чиқарилди. Бу кўрсаткич ўтган йилнинг шу даврига нисбатан 10,7 фоизга кўп.
Шунингдек, хорижда ишлаб чиқарилган автомобиллар савдосида ҳам ижобий динамика кузатилди. Ой давомида мамлакатда 3 мингта импорт автомобиль сотилиб, йиллик ҳисобда 1,5 фоизлик ўсиш қайд этилди.
Электромобиллар
Февраль ойида енгил электромобиллар савдоси 6,9 мингтани ташкил этди. Бу кўрсаткич январь ойига нисбатан 14 фоизга кўп.
Йиллик таққослашда эса электромобиллар савдоси 1,5 баробар ошган.
Электромобиллар савдосининг асосий қисми Тошкент шаҳри ҳиссасига тўғри келмоқда. Февраль ойида пойтахтда 4,5 мингта электромобиль сотилиб, бу мамлакат бўйича умумий савдо ҳажмининг 65 фоизини ташкил этди.
