Ўзбекистонда банклар кесимидаги микроқарзлар бўйича ўртача фоиз ставкаси пасайди
8 сентябрь ҳолатига кўра, Ўзбекистонда микроқарзлар бўйича ўртача фоиз ставкаси 35,3 фоизни ташкил этиб, ўтган ойга нисбатан 1 фоизга пасайди. Энг паст фоизлар асосан давлат банклари ҳиссасига тўғри келмоқда.
Марказий банк одатий равишда, банклар кесимида микроқарзлар бўйича ўртача фоиз ставкасини эълон қилди.
2025 йил 8 сентябрь ҳолатига кўра, микроқарзлар бўйича ўртача фоиз ставкаси 35,3 фоизни ташкил этиб, ўтган ойнинг айни шу даврига нисбатан 1 фоизга пасайган.
Банклар орасида энг паст фоиз ставкаларини асосан давлат банклари тақдим қилмоқда. Жумладан, Алоқабанк бу ҳафтада ҳам энг паст фоиз ставкада кредит берувчи банк бўлиб турибди. Банкда ўртача ставка 22,7 фоизни ташкил қилаётган бўлса-да, бу кўрсаткич ўтган ойга нисбатан 2,1 фоизга кўпроқдир.
Кейинги паст ўртача ставкалар ОФБ, НБУ ва Трастбанкда кузатилди — уларнинг ҳар бирида микроқарзлар бўйича фоиз ставкаси 26,1 фоизни ташкил этди. Шунингдек, Зираат банк (27,7 фоиз), Агробанк (27,7 фоиз), МКбанк (27,4 фоиз) ва БРБ (27,3 фоиз) ҳам энг қулай шартларни таклиф қилаётган банклар қаторига киради.
Энг юқори фоиз ставкаси эса хусусий банкларда қайд этилган. Жумладан, TBC банкда микроқарзларнинг ўртача фоизи 42,5 фоиз(ўтган ойга нисбатан +0,6%), Анор банкда 41,2 фоиз, Тенге банкда эса 39,7 фоизни ташкил этмоқда.
Таққослаш учун, микроқарзлардан ташқари, жисмоний шахсларга ажратилаётган кредитларнинг ўртача фоиз ставкаси 23,7 фоиз, юридик шахсларга ажратилаётган кредитлар бўйича эса 23,1 фоизни ташкил қилмоқда.
