Ўзбекистонда банк кредитлари бўйича фоиз ставкалари қандай ўзгармоқда?

Ўзбекистонда аҳолига ажратиладиган кредитлар бўйича ўртача фоиз ставкаси кетма-кет тўрт ой давомида кўтарилмоқда. 2025 йил апрель ойида миллий валютадаги кредитларнинг ўртача ставкаси сўнгги йиллардаги энг паст даражага — 22,6 фоизгача тушган эди.

Шундан буён фоизларда босқичма-босқич ўсиш кузатилмоқда. Жумладан кўрсаткич май ойида 23,1 фоиз, июнда 23,7 фоиз, июлда 23,8 фоиз, августда эса 24,1 фоизга етди. 

Марказий банк сентябрь учун умумий ўртача ставкани ҳали эълон қилмаган. Аммо 29 сентябрда эълон қилинган маълумотга кўра, жисмоний шахсларга ажратилаётган кредитлар бўйича ўртача ставка 23,7 фоизни ташкил қилган. Бу эса сентябрь ойида фоизларнинг бироз пасайиши мумкинлигини кўрсатмоқда.

Микроқарзлар

29 сентябрь ҳолатига кўра, микроқарзлар бўйича банклар кесимидаги ўртача фоиз ставкаси кузатувлар бошланганидан бери энг паст даражага — 33,8 фоизгача тушди. Бу ўтган ойга нисбатан 2,1 фоизга кам.

Банклар ичида энг паст ставкани ҳали ҳам Алоқабанк таклиф қилмоқда — 24,8 фоиз. Бироқ бу кўрсаткич бир ой ичида 2 фоизга ошган. Кейинги ўринларда Трастбанк (25,9 фоиз) ва ОФБ (26 фоиз) қайд этилган.

Энг юқори ставка эса TBC банкда кузатилди — 44,5 фоиз. Бу ўтган ойнинг шу даврига нисбатан қарийб 2,2 фоиз пунктга ошганини билдиради. Шунингдек, Анорбанк (40,5 фоиз), Tenge bank (39,7 фоиз) ва Apex bank (39,6 фоиз) ҳам нисбатан юқори фоизлар билан ажралиб турибди.

Автокредитлар

Автокредитлар бўйича ўртача фоиз ставка ҳозирда 24 фоизни ташкил қилмоқда. Бу ўтган ойга нисбатан 0,3 фоиз юқори.

Банклар орасида энг паст фоизли автокредитни Ипотека банк тақдим этмоқда — 19,7 фоиз (ўтган ойга нисбатан 1 пунктга камайган). ОФБ, БРБ ва Гарант банк’ларда ҳам ўртача ставкалар нисбатан пастлигича қолмоқда.

Нисбатан юқори кўрсаткичлар Hamkorbank, Инфинбанк ва Мадад Инвест банкларда кузатилиб, бу ерда ўртача ставка 27,6 фоиздан 27,9 фоизгача етмоқда.