Ўзбекистон паспортининг жаҳон рейтингидаги ўрни юқорилади
Ўзбекистон паспорти халқаро рейтингда саккиз поғона юқорилаб, 2025 йилда 72-ўринни эгаллади.
Рейтингда биринчи ўрин Сингапурга, ундан кейинги ўринлар Япония ва Жанубий Кореяга насиб этди.
Марказий Осиё давлатлари ичида эса Қозоғистон 79 та мамлакатга визасиз кириш имконияти билан етакчилик қилди.
Henley & Partners инвестицион компанияси эълон қилган 2025-йилги халқаро паспортлар рейтингида Ўзбекистон 72-ўринни эгаллади.
Бу кўрсаткич ўтган йилга нисбатан саккиз поғона юқори. Шунга қарамай, ўзбекистонликлар аввалгидек 62 та мамлакатга визасиз ёки бориб виза олиш тартибида кириш ҳуқуқига эга.
Рейтингда биринчи ўрин Сингапурга насиб этди. Бу давлат фуқаролари 193 мамлакат ва ҳудудга ҳеч қандай олдиндан рухсат олмасдан, визасиз ёки келгач виза олиш имкониятига эга (ўтган йили 195 та эди). Иккинчи поғонада Япония ва Жанубий Корея жойлашиб, уларнинг фуқаролари 190 та мамлакатга визасиз сафар қила оладилар.
Учинчи ўринни эса бир вақтнинг ўзида етти давлат — Дания, Финляндия, Франция, Германия, Ирландия, Испания ва Италия эгаллади. Уларнинг паспорт эгалари дунёнинг 189 мамлакатига визасиз бориш имкониятига эга. Кучли бешликка шунингдек Европанинг бошқа давлатлари ва Янги Зеландия ҳам кирди.
Марказий Осиё мамлакатлари орасида энг юқори натижа Қозоғистонга тегишли бўлиб, унинг фуқаролари 79 та мамлакатга визасиз кира олади. Минтақада Қирғизистон 71-ўринда, Ўзбекистон 72-ўринда, Тожикистон 78-ўринда, Туркманистон эса 84-ўринда қайд этилди.
Рўйхатнинг охирги ўринларида Афғонистон, Ироқ ва Сурия жойлашди.
