Ўзбекистон капитал бозори капиталлашуви бир йилда 76% ошиб, $35,7 млрдга етди

Истиқболли лойиҳалар миллий агентлиги маълумотига кўра, 2026 йил 1 июль ҳолатига Ўзбекистон капитал бозорининг умумий капиталлашуви $35,7 млрдга етган. Бу ўтган йилнинг шу даврига нисбатан 76,3% кўп.

Бундан келиб чиқиб, бир йил аввал капитал бозорининг капиталлашуви қарийб $20,2 млрд бўлган. Яъни 12 ой ичида бозор қиймати тахминан $15,5 млрдга ошган.

Қимматли қоғозлар чиқарилишининг умумий ҳажми эса $23,1 млрдни ташкил этган. Айниқса корпоратив облигациялар сегментида кескин ўсиш кузатилган: уларнинг эмиссияси бир йил ичида 129,3%га ошиб, $587 млнга етган. Бу бир йил аввалги қарийб $256 млнлик ҳажмдан 2,3 баравар кўп.

Айни пайтда корпоратив облигацияларга эгалик қилувчи чакана инвесторлар сони ҳам 131,5%га кўпайган. Бу облигациялар бозорининг нафақат эмиссия ҳажми, балки инвесторлар базаси бўйича ҳам кенгаяётганини кўрсатади.

Капитал бозоридаги йирик воқеалардан бири UzNIF Миллий инвестиция фондининг Лондон ва Тошкент биржаларидаги икки томонлама листинги бўлди. Жойлаштириш орқали $603,6 млн жалб қилинди, инвесторлар буюртмалари эса $2,8 млрдга етди. Яъни талаб таклиф қилинган ҳажмдан қарийб 4,6 баравар юқори бўлган.

Шу билан бирга, “Тошкент” фонд биржаси маълумотларида 2026 йилнинг биринчи ярми якунида листингдаги компаниялар капиталлашуви 428,06 трлн сўм ёки қарийб $35,7 млрд экани қайд этилган. Бу кўрсаткич 2025 йил охирига нисбатан 50,4%га ошган. Фарқ таққослаш даврида: ИЛМА 76,3%лик ўсишни йиллик, фонд биржаси эса 50,4%лик ўсишни 2025 йил охирига нисбатан ҳисоблаган.

Капитал бозорининг кенгайиши фонида янги инструментлар ҳам пайдо бўлмоқда. Хусусан, сентябрь ойида “Asia Alliance Bank”нинг $20 млнлик долларда номиналланган корпоратив облигациялари давлат рўйхатидан ўтказилди. Бу Ўзбекистонда хорижий валютада чиқарилган илк корпоратив облигация эмиссияси бўлди.