Ўзбекистон банклари омонат фоиз ставкаларини пасайтирмоқда

Ўзбекистоннинг қатор банкларида омонат бўйича фоиз ставкалари 23% дан ошмайдиган қилиб пасайтирилмоқда. Бу жараён Марказий банк асосий ставкани 14% га оширганидан кейин юз бермоқда.

Ҳозирча фақат 6 та банк фоизларнинг туширилиши ҳақида расмий маълумот берган:

Ўзмиллийбанк

Мазкур банкда қуйидаги ўзгаришлар бўлади:

• “Мустақиллик 27”, “Фойдали” ва “Сармоя” омонатлари бўйича янги омонат очиш тўхтатилди.
• “Жозибали” омонати банк офисида очилса – 20%, Миллий иловаси орқали очилса – 21%.

Агробанк

Агробанкнинг хабар беришича, 1 апрелдан бошлаб қуйидаги омонатлар бўйича фоиз ставкалари 21% этиб белгиланади:

• “Сандиқ”(амалда 23%)
• “Комфорт”(амалда 22%)
• “Прогресс”(амалда 23%)

TBC Bank

TBC Bank аввал 27% бўлган максимал омонат фоиз ставкасини 26% га туширган эди. 20 март куни эса банк 1 апрелдан бошлаб фоизлар яна пасайишини эълон қилди. Янгиланган ставкаларга кўра:

• Тўлдириладиган муддатли омонатлар – 18,5% дан 21% гача (ҳозирда 23-24%)
• Муддатли омонатлар – 20,5% дан 23% гача (ҳозирда 25-26%)

Анорбанк

Анорбанк ҳам 1 апрелдан бошлаб омонат фоизлари тушишини тасдиқлади. Янги тарифларга кўра:

• “Юқори Daromad” – 26% → 23% 
• “Кўрпача” – 25% → 22% 
• “Тез” (янги омонат) – 22%
• “Барака” (янги омонат) – 21%

Ипотекабанк

• “Конструктор” омонати бўйича фоиз ставкаси 23,5% дан 22% га туширилади.

Иқтисодчи Отабек Бакировга кўра, барча банкларнинг бир вақтнинг ўзида фоиз ставкаларини пасайтириши Марказий банкнинг топшириғи натижаси бўлиши мумкин:

"Ўзбекистонда банклар бир вақтда ва синхрон равишда ставкаларни пасайтириши одатда фақат маъмурий топшириқ ёки босим натижасида содир бўлади. Қизиғи, Марказий банк бундай ҳолатга қандай изоҳ беради?" – дея таъкидлаган иқтисодчи.

Марказий банк ҳозирча банклардаги бундай синхрон ўзгаришга расмий муносабат билдиргани йўқ.

Банклардаги янги шартлар 1 апрелдан бошлаб амалга киради. Ушбу санадан олдин очилган омонатларга эса янги шартлар татбиқ этилмайди.