Ўз-ўзига кредит олишни тақиқлаш хизматидан асосан эркаклар фойдаланмоқда

Ўзбекистонда қарийб 150 минг фуқаро ўз ихтиёри билан кредит олишни тақиқлаган. Бу ҳақда Кредит-ахборот таҳлил маркази (КАТМ) ўзининг Телеграм-каналида маълум қилди.

Маълумотларга кўра, 1-октабр ҳолатига 149 465 нафар жисмоний шахс бепул “Кредитга тақиқ” хизматига уланган.

Гендер кесимида эркаклар аниқ устунлик қилади. Эркаклар 101,4 мингни, аёллар эса 47,9 минг кишини ташкил этади. Шундай қилиб, хизмат фойдаланувчиларининг қарийб 68 фоизи эркаклардир.

Ёш тоифалари бўйича, энг фаол фойдаланувчилар — 26–35 ёшдагилар бўлиб, улар барча фойдаланувчиларнинг учдан бир қисмини ташкил этади. Кейинги ўринларда 36–45 ёшдагилар (25,6%) ва 26 ёшгача бўлганлар (19,2%) жой олган.

Хизмат ишга тушган июнь ойида 33,1 минг киши ундан фойдаланган бўлса, кейинги ойларда бу кўрсаткич барқарор ўсди: 

• июлда — 37,6 минг;
• августда — 37,8 минг;
• сентябрда — 40,8 минг киши.

Октябрь ойи учун маълумотлар ҳали эълон қилинмади.

“Кредитга тақиқ” хизматини ёқиш ёки ўчиришнинг тўрт хил усули мавжуд:

1. КАТМ мобил иловаси орқали;

2. Portal.infokredit.uz сайтида шахсий кабинет орқали;

3. My.gov.uz портали орқали;

4. Давлат хизматлари марказлари орқали.

Хизматдан фойдаланиш мутлақо бепул.