OpenAI 2027 йилда 1 трлн долларлик баҳолаш билан IPO’га чиқиши мумкин
ChatGPT яратувчиси OpenAI 2027 йилда акцияларини биржага чиқаришга тайёр бўлиши мумкин. Компания аввал IPO доирасида 1 трлн долларгача баҳоланишни кўзлаган, сўнгги инвестиция музокараларида эса унинг қиймати 1,25 трлн доллар атрофида муҳокама қилинмоқда.
OpenAI президенти ва ҳаммуассиси Грег Брокман 4 ноябрь куни Калифорнияда бўлиб ўтган The Wall Street Journal технология конференциясида компаниянинг биржага чиқиш режалари ҳақида гапирди. Бу ҳақда Reutes хабар бермоқда.
Ундан OpenAI 2027 йилда бирламчи оммавий акциялар таклифини (IPO) ўтказишга тайёр бўладими, деб сўралганида, Брокман “Менимча, ҳа”, дея жавоб берган. Бироқ компания IPOнинг аниқ санаси ва шартларини ҳозирча эълон қилмаган.
OpenAI 2026 йил июнида АҚШда биржага чиқиш учун махфий ариза топширганини тасдиқлаган эди. Ўша пайтда Reuters компания IPO давомида 1 трлн долларгача баҳоланишни мақсад қилганини хабар қилган.
Шу билан бирга, OpenAI’нинг хусусий инвестициялар бозоридаги баҳоси сезиларли ошган. Компания март ойида 122 млрд долларлик инвестиция мажбуриятларини жалб қилиб, 852 млрд долларга баҳоланган.
Октябрь охирида эса Financial Times OpenAI навбатдаги молиялаштириш босқичида 20 млрд доллар жалб қилишни кўзлаётганини хабар қилди. Дастлаб компания 1,4 трлн долларлик баҳолаш асосида 30 млрд доллар йиғишни режалаштирган, бироқ инвесторлар қизиқиши пасайиши ортидан мақсадли сумма 10 млрд долларга, баҳолаш эса 1,25 трлн долларгача қисқартирилган.
Бу рақамлар IPOнинг якуний баҳоси эмас. Компаниянинг биржага чиқишдаги қиймати бозор шароити ва инвесторлар талабига қараб ўзгариши мумкин.
Айни пайтда OpenAI даромадлари таркибида ҳам муҳим ўзгариш юз бермоқда. Брокманнинг сўзларига кўра, корпоратив мижозлар компания тушумининг ярмидан кўпини таъминлай бошлаган. Таққослаш учун, апрель ойида бизнес мижозлари улуши 40 фоиздан ошгани маълум қилинган эди.
Компания бу йўналишда, хусусан, дастурлаш жараёнларини автоматлаштирувчи Codex сунъий интеллект агентини фаол ривожлантирмоқда. OpenAI корпоратив AI бозорида Claude модели яратувчиси Anthropic билан рақобатлашмоқда.
Брокманнинг таъкидлашича, 2026 йилнинг учинчи чорагида OpenAI’нинг йиллик ҳисобга келтирилган даромади чорак давомида 70 фоизга ўсган, корпоратив сегментдаги кўрсаткич эса икки бараварга ошган.
Аввалроқ OpenAI бош директори Сэм Альтман компания 2026 йилда биржага чиқмаслигини билдирган эди. У буни сунъий интеллект хавфсизлиги билан боғлиқ масалалар ва хусусий компания мақомида қолишнинг афзалликлари билан изоҳлаган.
