NVIDIA бозор қиймати бир кунда $270 млрдга камайди
2025 йил бошида $3,66 трлн бўлган NVIDIA компаниясининг бозор қиймати ҳозирда $2,47 трлнга тушди. Бу эса $1,19 трлнлик йўқотиш кузатилганини англатади.
17 апрель куни NVIDIA (NVDA) акциялари қарийб 3 фоизга арзонлашди. Бу пасайиш компания акциялари сешанба куни 7 фоизга тушганидан кейинги давомий жараён бўлди.
Пасайишнинг асосий сабаби — АҚШ ҳукумати томонидан сунъий интеллект чипларини Хитойга экспорт қилишга қўйилган қатъий чекловлардир.
NVIDIA 15 апрель куни берган расмий баёнотида, АҚШнинг тобора кескинлашаётган савдо чекловларига риоя этиш мақсадида, айнан Хитой бозори учун ишлаб чиқилган H20 чипларининг савдоси тўхтатилганини билдирди. Компания бу чекловлар туфайли биринчи чоракда $5,5 млрдгача зарар кўришини прогноз қилмоқда.
17 апрель кунги акциялар тушиши натижасида NVIDIA’нинг бозор капиталлашуви Bloomberg маълумотларига кўра $2,47 трлнга тушди. Бу эса янги савдо сиёсати эълон қилингандан бери компания умумий ҳисобда $266 млрд йўқотганини англатади.
JPMorgan таҳлилчиси Ҳарлан Сур чоршанба куни берган изоҳида, бу ўзгаришлар NVIDIA’нинг бутун йил давомида маълумотлар маркази даромадлари ва акциядорлик фойдасини 8–10% га камайтириши мумкинлигини таъкидлади. Унга кўра, компания йил якунида $15–16 млрдгача даромад йўқотиши эҳтимоли мавжуд.
Ўтган йил давомида акциялари рекорд даражада ўсган NVIDIA’нинг бозор қиймати 2025 йил 6 январь ҳолатига кўра $3,66 трлнни ташкил қилган эди. Бироқ йил бошлангандан бери компания $1,19 трлнлик бозор қийматини йўқотди. 17 апрель ҳолатига кўра бу кўрсаткич $2,47 трлнга баҳоланмоқда.
