Meta Instagram, Facebook ва WhatsApp учун пуллик обуналарни ишга туширди
Meta Instagram, Facebook ва WhatsApp фойдаланувчилари учун янги “Plus” пуллик обуна режаларини глобал миқёсда ишга туширди. Компания, шунингдек, бизнеслар, контент яратувчилар ва Meta AI фойдаланувчилари учун “Meta One” номли янги обуна пакетларини синовдан ўтказади.
Instagram Plus ва Facebook Plus обуналари ойига $3,99, WhatsApp Plus эса $2,99 туради. Ушбу режалар фойдаланувчиларга профилни шахсийлаштириш, Story статистикаси, қўшимча реакциялар, махсус илова иконкалари ва бошқа функциялардан фойдаланиш имконини беради.
Instagram Plus орқали фойдаланувчилар Story’ларни кимлар қайта кўрганини билиш, Story муддатини 24 соатдан кўпроққа узайтириш, томошабинлар рўйхатида кўринмасдан Story кўриш ва постларни обуначилар лентасида чиқармасдан профилга жойлаш каби имкониятларга эга бўлади.
Facebook Plus ҳам шунга ўхшаш функцияларни таклиф қилади. WhatsApp Plus эса app мавзулари, махсус қўнғироқ оҳанглари, қўшимча pin қилинган чатлар ва premium стикерлар каби имкониятларни ўз ичига олади.
Meta’нинг таъкидлашича, янги Plus обуналари Meta Verified ўрнини босмайди. Meta Verified асосан аккаунтни тасдиқлаш, сохта профиллардан ҳимоя ва қўшимча ёрдам хизматларига қаратилган.
Шу билан бирга, компания Meta AI учун ҳам пуллик режаларни синовдан ўтказади. Meta One Plus ойига $7,99, Meta One Premium эса $19,99 этиб белгиланган. Premium режа мураккаб сўровлар учун кўпроқ ҳисоблаш қуввати, чуқурроқ “thinking mode”, шунингдек, расм ва видео генерацияси имкониятларидан кенгроқ фойдаланишни таклиф қилади. Meta AI эса оддий фойдаланувчилар учун бепул қолади.
