Meta 100 граммли VR-кўзойнак ва камерасиз Ray-Ban’ни тақдим этди

Meta виртуал реаллик қурилмаларини анъанавий кўзойнак шаклига олиб келди. Meta VR Glasses’нинг оғирлиги 100 граммни ташкил этади — бу 2023 йилда чиқарилган Meta Quest 3’дан қарийб беш баравар енгил.

Кўзойнак алоҳида контроллерсиз бошқарилади. Фойдаланувчининг нигоҳи курсор, бармоқ ҳаракати эса босиш вазифасини бажаради. Овозли буйруқлар учун Meta’нинг Muse сунъий интеллект агенти ишлатилади.

Бироқ ҳисоблаш қуввати, хотира ва батарея кўзойнакнинг ўзида эмас. У сим орқали ташқи ихчам қурилмага уланади. Meta шу йўл билан қурилма оғирлигини камайтирган.

Кўзойнакда фильмлар ва спорт трансляцияларини иммерсив форматда томоша қилиш, виртуал мониторлар яратиш ҳамда Mac ёки Windows компьютерига уланиш мумкин. Исталган текис юзада виртуал клавиатура очилади. Meta қурилма сотувга чиққан пайтда 100 дан ортиқ жонли спорт трансляцияси ва қўл ҳаракатлари билан бошқариладиган 75 дан зиёд ўйин мавжуд бўлишини билдирган.

Ундан ташқари, кўзойнак фойдаланувчининг фотореалистик рақамли нусхасини яратиб, голограмма кўринишида видео-қўнғироқ қилиш имконини беради. Meta VR Glasses 2027 йил баҳорида 1 300 доллардан сотувга чиқарилиши режалаштирилган.

Камерасиз Ray-Ban Meta Audio

Meta камерасиз Ray-Ban Meta Audio кўзойнагини ҳам намойиш қилди. Қурилмада экран ва видео ёзиш имконияти йўқ, бироқ ундан мусиқа тинглаш, қўнғироқ қилиш ва Meta AI билан суҳбатлашиш мумкин.

Очиқ турдаги динамиклар фойдаланувчига атрофдаги товушларни эшитган ҳолда мусиқа тинглаш имконини беради. Бир марталик қувват билан ишлаш муддати 12 соатгача етади. Ray-Ban Meta Audio октябрь ойида 349 доллардан сотувга чиқади.

Компания кўзойнакларга енгил ва ўрта даражадаги эшитиш қобилияти пасайишини қоплашга ёрдам берувчи функцияни ҳам қўшмоқда. АҚШда тиббий тасдиқдан ўтган бу имконият алоҳида 150 доллар ёки Meta One обунаси орқали таклиф қилинади.

Айни пайтда учинчи авлод Ray-Ban Meta кўзойнаклари ҳам 449 доллардан сотувга чиқарилди. Улар аввалги моделларга нисбатан юпқароқ корпус ва узайтирилган батарея муддатига эга.

Muse энди алоҳида қурилмада ишлайди

Meta Muse сунъий интеллект агенти учун кафт ҳажмидаги Muse Charm қурилмасини ҳам тайёрламоқда. Уни калит илгичи каби олиб юриш ва телефон ёки компьютерсиз AI агент билан мулоқот қилиш мумкин.

Muse саёҳатни режалаштириш, жой банд қилиш, маҳсулот буюртма бериш ва электрон почта қутисини бошқариш каби вазифаларни бажара олади. Meta бунинг учун OpenTable, Spotify ва Ticketmaster каби сервислар билан ҳамкорлик қилмоқда.

Muse Charm’ни декабрь ойида чиқариш режалаштирилган, бироқ унинг нархи ҳозирча очиқланмади.