Марказий банк раиси ўзгариши кутилмоқда
Президент томонидан Олий Мажлис Сенатига регулятор раисини эгаллаб турган лавозимидан озод этиш тўғрисида тақдимнома киритилди.
Тимур Ишметов эса Марказий банк раиси бўлиши кутилмоқда.
Ўзбекистон Республикаси Президенти томонидан Олий Мажлис Сенатига Марказий банк бошқаруви раиси Мамаризо Нурмуратовни эгаллаб турган лавозимидан озод этиш тўғрисида тақдимнома киритилди.
Конституциянинг 95-моддасига кўра, Марказий банк раиси Президентнинг Олий Мажлис Сенатига киритилган тақдимномаси орқали лавозимга тайинланади ва озод этилади.
Нурмуратов Мамаризо Бердимуратович 1960 йилда Самарқанд вилоятида туғилган. 1982 йилда Ленинград иқтисодиёт ва молия институтини иқтисодчи мутахассислиги бўйича тамомлаган. Банк тизимида 17 йиллик тажрибага эга.
Марказий банкдаги фаолиятини 1993 йилда бошлаган:
- 1993-1996 — Ўзбекистон Республикаси Марказий банки илмий тадқиқотлар маркази директори.
- 1996-2000 — Ўзбекистон Республикаси Марказий банки раиси биринчи ўринбосари.
- 2000-2004 — Ўзбекистон Республикаси Молия вазири.
- 2004-2006 — Самарқанд вилояти ҳокими.
- 2006-2017 — Ўзбекистон Республикаси Марказий банки раиси маслахатчиси.
- 2017 йилдан буён Ўзбекистон Республикаси Марказий банки Раиси лавозимида ишлаб келаётган эди.
Хабарларга кўра, Марказий банк бошқаруви раиси лавозими учун асосий номзод сифатида Тимур Ишметов кўриб чиқилмоқда. Ҳозирда вазифани вақтинча бажариш раиснинг биринчи ўринбосари Нодирбек Сайдуллаев зиммасига юклатилган.
Тимур Ишметов 2022 йил 30 декабрдан бери Президентнинг иқтисодиёт соҳаларини ривожлантириш, инвестиция ва ташқи савдо сиёсатини амалга ошириш масалалари бўйича маслаҳатчисининг биринчи ўринбосари лавозимида ишлаб келаётганди.
