Марказий банк Мустақилликнинг 35 йиллигига бағишланган олтин тангаларни сотувга чиқарди
Марказий банк Ўзбекистон мустақиллигининг 35 йиллигига бағишланган эсдалик олтин тангаларни сотувга чиқарди. 999,9 асилликдаги соф олтиндан зарб этилган ҳар бир танганинг вазни 31,1 грамм, номинал қиймати эса 100 минг сўмни ташкил этади. Тангаларни уч доналик коллекция тўпламида ёки алоҳида харид қилиш мумкин.
Марказий банк Ўзбекистон мустақиллигининг 35 йиллиги муносабати билан янги эсдалик олтин тангаларини сотувга чиқарди.
Тангалар 999,9 асилликдаги соф олтиндан тайёрланган. Ҳар бирининг вазни 31,1 грамм бўлиб, тангаларда 100 000 сўм номинал қиймат кўрсатилган.
Коллекция уч хил дизайндаги тангадан иборат. Биринчи тангада 1991–2026 йиллар ва “35” рақами акс эттирилган. Унинг иккинчи томонида Ўзбекистон давлат мадҳиясидаги “Оламни маҳлиё айлаган диёр!” сатри, шунингдек, мадҳиянинг 1992 йил 10 декабрда қабул қилингани қайд этилган.
Иккинчи тангада Мустақиллик монументи тасвирланган. Унда 1991 ва 2026 йиллар ҳамда монумент тасвири жойлаштирилган.
Яна бир тангада Тошкентдаги Ислом цивилизацияси маркази акс эттирилган. Танганинг иккинчи томонида Ўзбекистон давлат герби ҳамда унинг қабул қилинган санаси — 1992 йил 2 июль кўрсатилган.
Шунингдек, Марказий банк 999,9 асилликдаги соф кумушдан зарб этилган эсдалик тангаларни ҳам сотувга чиқарди. Ҳар бир танганинг вазни 31,1 граммни ташкил этади.
Марказий банк маълумотига кўра, тангаларда Ўзбекистон Республикасининг давлат рамзлари тимсолларидан фойдаланилган. Уларни уч доналик коллекция сифатида ёки алоҳида ҳолда харид қилиш мумкин.
