Марк Цукерберг битта мутахассисни ишга олиш учун $15 млрд сарфлаган бўлиши мумкин

Meta сунъий интеллект соҳасидаги йирик стартаплардан бири — Scale AI компаниясининг 49 фоиз улушини 15 миллиард долларга сотиб олди. Расмий баёнотда бу стратегик ҳамкорлик ва инвестиция деб қайд этилган. Бироқ, Business Insider ёзишича, бу битим ортидаги асосий мақсад — компаниянинг асосчиси ва бош директори Александр Вангни Meta жамоасига жалб қилиш бўлиши мумкин.

28 ёшли Ванг Scale AI’нинг бош директори ва асосчиларидан бири. Янги келишувга кўра, у Meta’га ўтиб, компаниянинг “superintelligence” ташаббуслари устида ишлайди. 

Meta баёнотида шундай дейилади: 

“Scale AI билан ҳамкорлигимизни янада чуқурлаштирамиз ва Александр Ванг Meta’даги сунъий интеллект йўналишларида биз билан бирга ишлайди”.

Технология таҳлилчиси Бен Томпсон буни “жуда қимматга тушган acquihire” деб атади. Acquihire — бу стартап ёки компанияни асосан унинг истеъдодли ходимлари учун сотиб олишни англатади. Бундай ҳолатларда маҳсулот иккинчи ўринга тушади, асосий мақсад эса инсон капитали бўлади.

Ванг юқори даражадаги AI тадқиқотчиси эмас, балки техникадан хабардор, бироқ асосан компаниясини илгари суриш ва инвесторларни жалб қилишда ўзини кўрсатган бизнес етакчи сифатида танилган. Financial Times’нинг таъкидлашича, у жамоани бошқариш ёки фундаментал илмий ишланмалардан кўра кўпроқ маркетинг ва ташаббусларни илгари суришда самарали.

Meta илгари ҳам Instagram ва WhatsApp каби платформаларни йирик маблағга сотиб олиб, асосчиларини тез орада йўқотган. Масалан, Instagram’нинг асосчиларидан бири Майк Кригер ҳозирда Meta рақобатчиларидан бири бўлган Anthropic компаниясида ишламоқда.

Бундай хавфларга қарамай, сунъий интеллект келажагига ишонаётган Meta каби компаниялар инсон капитали учун миллиардлаб доллар сарфлашдан қайтмаяпти. Агар Александр Ванг ҳақиқатан ҳам Meta’нинг AI бўйича устунлик сари ҳаракатида муҳим рол ўйнай олса, бу сармоя ўзини оқлаши мумкин.