“Made in USA” дея тақдим этилган Трамп телефони Хитойда ишлаб чиқарилиши мумкин
Доналд Трампга тегишли компания “АҚШда ишлаб чиқарилган” дея T1 смартфонини тақдим этди. Аммо мутахассислар телефоннинг асосий қисмлари чет элдан келтирилишини ва АҚШда бундай қурилмаларни тўлиқ ишлаб чиқариш учун инфратузилма йўқлигини таъкидлашмоқда.
АҚШ президенти Доналд Трампга тегишли бўлган Трамп Organization яқинда ўзининг янги смартфони — Т1 моделини тақдим этди. Олтин рангдаги ушбу қурилма $499 туради ва Google’нинг Android операцион тизимида ишлайди.
Компания телефон “АҚШда ишлаб чиқарилади” деб эълон қилган бўлса-да, технология соҳаси мутахассислари бу даъвога шубҳа билан қарамоқда. IDC компанияси вице-президенти Франсиско Жеронимонинг таъкидлашича, смартфонни бутунлай АҚШда ишлаб чиқариш ёки нолдан лойиҳалаштириш амалда деярли имконсиз.
Сабаби, кўплаб технологик маҳсулотлар бошқа мамлакатларда ишлаб чиқарилиб, кейин бренд томонидан ўз номи билан сотувга чиқарилади. Бундай ишлаб чиқарувчилар “ODM” (Original Design Manufacturer) деб аталади. Т1 модели ҳам, катта эҳтимол билан, айнан шундай тарзда тайёрланади.
Counterpoint Research таҳлилчилари ҳам бу фикрни қўллаб-қувватлайди. Уларнинг айтишича, телефон “АҚШ маҳсулоти” сифатида реклама қилинаётган бўлса-да, аслида у Хитойдаги заводларда йиғилиши эҳтимолдан холи эмас. Компания вакилларидан бири шундай дейди:
“АҚШда бу даражадаги смартфонларни тўлиқ ишлаб чиқариш учун зарур инфратузилма ҳали мавжуд эмас”.
Чет элдан қисмлар келтирилиши шарт
Ҳатто телефоннинг айрим қисмлари АҚШда йиғилса ҳам, бутун дунё бўйлаб тарқалган таъминот занжирини ҳисобга олганда, кўплаб эҳтиёт қисмлар барибир бошқа мамлакатлардан келади.
T1 ҳам бундан мустасно эмас. Масалан, 6.8 дюмли AMOLED экранни Samsung, LG (Жанубий Корея) ёки Хитойдаги BOE компаниялари етказиб беради.
Chip масаласига келсак, бу нархдаги модель, катта эҳтимол билан, Тайваннинг MediaTek процессоридан фойдаланади. Ҳатто Qualcomm чиплари танланса ҳам, унинг ишлаб чиқарилиши яна Тайванга тўғри келади.
50 мегапикселлик камера учун зарур бўлган тасвир датчикларини эса асосан Япония компанияси Sony етказиб беради. Бошқа кичик ишлаб чиқарувчилар ҳам бор, лекин Sony бозорда етакчи.
Хотира бўйича эса АҚШнинг Micron компанияси вариант сифатида кўрилади. Лекин бу ерда ҳам Samsung каби рақобатчилар мавжуд.
Глобал таъминот занжири мавжуд бўлган бир пайтда, телефонни бутунлай АҚШ маҳсулоти сифатида кўрсатиш ҳақиқатдан йироқ бўлиши мумкин.
