“Кафолат суғурта” устав капиталига янги акциядор қўшилиши кутилмоқда
“Кафолат суғурта компанияси” АЖ устав акциядор 240 млрд сўмга ошириш учун 24,5 млрд дона янги акция чиқаришни режалаштирмоқда.
Акциялар ёпиқ обуна орқали жойлаштирилади, акциядорлар имтиёзли ҳуқуқидан фойдаланмаган тақдирда эса улар Инагамжанова Дилобар Бахтияровнага берилиши мумкин.
5 февраль куни “Кафолат суғурта компанияси” АЖ Кузатув кенгашининг йиғилиши бўлиб ўтди. Унда компания устав капиталини 240 млрд сўмга ошириш тўғрисида қарор қабул қилинди.
Мазкур қарорга мувофиқ, номинал қиймати 1 сўм бўлган 24,5 млрд дона оддий акция чиқарилади. Ушбу акциялар акциядорларга имтиёзли сотиб олиш ҳуқуқини бериш орқали ёпиқ обуна усулида жойлаштирилади.
Агар акциядорлар ўзларининг имтиёзли сотиб олиш ҳуқуқидан фойдаланмаса ёки қисман фойдаланса, қолган акциялар ёпиқ обуна орқали Инагамжанова Дилобар Бахтияровнага жойлаштирилади. Бу эса компанияга янги акциядор кириб келиши мумкинлигини англатади.
Жараён якунлангач, компаниянинг устав капитали 455,5 млрд сўмга етади.
Маълумот учун, 2024 йил апрель ойида “Тошкент” Республика фонд биржасида “Кафолат суғурта” акциялари делистинг қилинган эди.
Ҳозирда “Кафолат суғурта” компаниясининг ягона акциядори Plum Technologies АЖ ҳисобланади. Мазкур компания 2017 йилда ташкил этилган бўлиб, финтех йўналишида, жумладан электрон тижорат ва онлайн тўловлар соҳасида фаолият юритади.
Plum Technologies’нинг устав капитали 223 млрд сўмни ташкил этади. Компания акцияларининг 98,8 фоизи Акилов Акбар Анваровичга, қолган қисми эса Азиз Бакиевга тегишли.
Бундан ташқари, Акбар Акилов Uzcard тўлов тизими Кузатув кенгаши раиси ҳисобланади.
Акилов, шунингдек, 2024 йилдан буён Uzcard’ни юритиб келаётган “USMG” МЧЖда 25 фоизлик улушга эга. Компаниянинг қолган 75 фоизи эса “IMC-Capital” МЧЖ хорижий компаниясига тегишли. “IMC-Capital” ўз навбатида бошқа бир хорижий компания — Berill Holding Company Limeted’га қарашли бўлиб, унинг директори сифатида Азиз Юсупов (кузатув кенгаши аъзоси) кўрсатилган.
