Илон Маск бойлиги $500 млрдга етган тарихдаги биринчи инсонга айланди

Tesla бош директори Илон Маск бойлиги $500 млрдга етган  тарихдаги илк инсонга айланди. Бунга электромобиль компанияси акцияларининг қайта тикланиши ва тадбиркорнинг бошқа стартаплари қийматининг ошиши сабаб бўлди.

Forbes миллиардерлари рейтингига кўра, Маскнинг бойлиги $500,1 млрдни ташкил этди. Айни пайтда эса унинг бойлиги бироз пасайган.

Маскнинг бойлиги асосан Tesla билан боғлиқ. У 15-сентабр ҳолатига кўра компанияда 12,4 фоиздан ортиқ улушга эга эди. Компания акциялари қиймати йил бошидан бери 14 фоиздан кўпроққа ошди ва чоршанба куни 3,3 фоизга кўтарилди. Бу эса Маскнинг бойлигига қўшимча $6 млрд олиб келди.

Йил бошида оғир даврни бошидан кечирган бўлса-да, Tesla акциялари кейинги ойлар давомида ўсиш йўлига қайтди. Бунга Маскнинг ўз компанияларига яна кўпроқ эътибор қаратиши сабаб бўлди. Tesla кенгаши раиси Робин Денҳолм ўтган ой Маскнинг бир неча ой Оқ уйда вақт ўтказгач, яна компания марказида эканини айтган эди.

Орадан бир неча кун ўтиб, Маск Tesla акцияларини қарийб $1 млрдлик сотиб олганини маълум қилди. Бу компания келажагига бўлган улкан ишонч белгиси сифатида қабул қилинди, чунки Tesla автомобиль ишлаб чиқарувчидан сунъий интеллект ва робототехника гигантига айланиш йўлида ҳаракат қилмоқда.

Маскнинг сунъий интеллект стартапи xAI ва ракета компанияси SpaceX ҳам жорий йилда сезиларли даражада қимматлашди.

xAI компанияси июль ойида $75 млрдга баҳоланган эди. CNBC эса сентабрда компания янги инвестиция раундидан кейин қийматини $200 млрдга етказиши мумкинлигини хабар қилди. Бироқ Маск ўша пайтда капитал жалб қилинмаётганини айтган эди.

Bloomberg эса июль ойида SpaceX янги маблағ йиғиш ва ички акцияларни сотиш бўйича режалар муҳокама қилаётганини, компания қиймати $400 млрд атрофида баҳоланаётганини хабар қилган эди.

Forbes рўйхатида Маскдан кейинги ўринда Oracle асосчиси Ларри Эллисон турибди. Унинг бойлиги $350,7 млрд деб қайд этилган. Учинчи ўринни эса 245,8 млрд бойлик билан Марк Цукерберг эгаллаган.