Илон Маск Apple ва ОpenAI’ни судга берди
Илон Маскнинг X ва xAI компаниялари Apple ва OpenAI’ни iPhone’ларда фақат ChatGPT’ни қўллаб, рақобатни чеклаганликда айблаб судга мурожаат қилди. Компаниялар миллиардлаб доллар товон пули ҳамда Apple ва OpenAI ўртасидаги келишувни бекор қилишни сўрамоқда.
Илон Маск ўзининг X ва xAI компаниялари орқали Apple ва OpenAI’ни Техасдаги федерал судга берди. Бу ҳақда Bloomberg хабар берди.
Уларнинг айтишича, Apple iPhone’ларда фақат OpenAI’нинг ChatGPT чатботини қўллаш орқали сунъий интеллект бозорида рақобатни чеклаяпти ва одамларни танлов ҳуқуқидан маҳрум қилмоқда.
Маскнинг адвокатлари даъво аризасида ёзишича, Apple ва OpenAI ўзаро келишувга эришиб, iPhone операцион тизимига ChatGPT’ни ягона генератив AI чатбот сифатида қўшган. Натижада бошқа чатботлар App Store рейтингида юқорига чиқолмаяпти, бу эса янги иловалар ва инновациялар пайдо бўлишига тўсқинлик қилмоқда.
Маск бу орқали миллиардлаб доллар зарар кўрганини айтиб, товон пули талаб қилмоқда. Бундан ташқари, суддан Apple ва OpenAI ўртасидаги келишувни бекор қилишни ҳам сўраяпти.
OpenAI вакиллари бу айбловларни рад этиб, бу ҳолатни “Маскнинг доимий ҳужумлари” деб атаган. Apple эса ҳозирча изоҳ бермади.
Apple бундан олдин ҳам бир неча марта монополиячиликда айбланган. Масалан, 2023 йилда АҚШ Адлия вазирлиги компанияни iPhone’ларда бошқа ишлаб чиқувчиларга имконият бермасликда судга берган эди. Шунингдек, Apple Fortnite ўйини ишлаб чиқарувчиси Epic Games билан ҳам беш йилдан бери App Store қоидалари устидан судлашиб келмоқда.
Илон Маскнинг бу даъвоси эса яна бир бор Apple’нинг бозор устунлиги ва рақобатни чеклаш усулларини муҳокама марказига олиб чиқди. Суд жараёни яқин ойлар ичида Техаснинг Форт-Уорт шаҳрида бошланиши кутилмоқда.
