HUMO тўлов тизими 2025 йил биринчи ярмида рекорд даражада соф фойда олди
Эълон қилинган ҳисоботга кўра, компания январь-июнь ойларида 124,3 млрд сўм соф фойда олган. Бу ўтган йилнинг мос даврига нисбатан 52,4 млрд сўм ёки 73 фоизга кўпроқдир.
HUMO тўлов тизими 2025 йилнинг биринчи ярмида рекорд даражада соф фойда олди. Бу ҳақда компаниянинг олти ойлик якунлари бўйича тақдим этилган ҳисоботида келтирилган.
Ҳисоботга кўра, компания январь-июнь ойларида 124,3 млрд сўм соф фойда олган. Бу ўтган йилнинг мос даврига нисбатан 52,4 млрд сўм ёки 73 фоизга кўпроқдир.
HUMO 2024 йил давомида жами 167,3 миллиард сўм соф фойда кўрган эди. Бундан келиб чиқадики, компания жорий йилнинг дастлабки ярмиданоқ ўтган йилги умумий фойда даражасига деярли етиб олди.
Ушбу давр мобайнида компаниянинг соф тушумида ҳам сезиларли даражада ўсиш кузатилди. Мазкур кўрсаткич 60 фоизга ўсиб, 224,9 млрд сўмни ташкил этди.
Шунингдек HUMO’нинг административ харажатлари 18,74 млрд сўмга тенг бўлди.
Мавзуга доир: HUMO тўлов тизими дастлабки уч ойда 48 млрд сўм соф фойда олди
Шунингдек, компаниянинг тақсимланмаган соф фойдаси ҳам ортди. Ҳисобот даври бошидан бери бу кўрсаткич 76,2 млрд сўмга ошиб, 327,6 млрд сўмга етди.
1 июль ҳолатига кўра, компаниянинг жами активлари 574,7 миллиард сўмни ташкил этмоқда. Бу кўрсаткич йил бошидан бери 80,66 миллиард сўмга ошган.
Шунингдек, компания томонидан 13,8 миллиард сўм даромад солиғи тўланган.
Маълумот ўрнида, йил бошида HUMO тўлов тизими Paynet компанияси томонидан 65 миллион долларга сотиб олинган эди.
