Эндиликда мобил рақамни бошқа шахс номига онлайн қайта расмийлаштириш мумкин

Мобил алоқа фойдаланувчилари эндиликда My.gov.uz портали орқали мобил рақамни бошқа шахс номига онлайн тарзда қайта расмийлаштириши мумкин.

Аввал ушбу жараённи амалга ошириш учун амалдаги рақам эгаси ва янги эгаси мобил алоқа оператори офисига шахсан бориши, навбат кутиши ҳамда ҳужжатларни имзолаши талаб этиларди. Янги хизмат орқали мазкур жараён масофадан туриб бажарилиши мумкин.

Хизматдан фойдаланиш учун My.gov.uz портали ёки MyGov мобил иловасига кириб, “Мобил рақамни қайта расмийлаштириш” хизматини танлаш, керакли маълумотларни тўлдириб ариза юбориш талаб этилади. Ариза бериш жараёнида мобил рақам эгаси ҳамда уни қабул қилувчи шахс MyID орқали аризани тасдиқлаши зарур.

Мазкур хизмат мобил алоқа операторлари билан ҳамкорликда жорий этилмоқда. Хусусан, қуйидаги операторлар ушбу имкониятни йўлга қўйган:

• “Ўзбектелеком” АК (Uztelecom)
• “Unitell” МЧЖ ХК (Beeline)
• “RUBISON WIRELESS COMMUNICATION” МЧЖ (Perfectum)
• “UMS” МЧЖ (Mobiuz)
• “COSCOM” МЧЖ (Ucell)

Ушбу хизмат 22 апрелдан бошлаб кучга кирадиган янги тартиблар фонида жорий этилмоқда. Марказий банк қарорига кўра, кредит ва тўлов ташкилотларининг мобил иловаларида рўйхатдан ўтиш ҳамда банк карталарини улашда фойдаланиладиган телефон рақами фойдаланувчининг ўз номида бўлиши шарт.

Агар мобил рақам шахснинг ЖШШИР маълумотлари билан мос келмаса, фойдаланувчини мобил иловада рўйхатдан ўтказиш ёки банк картасини улаш жараёни рад этилади. Бироқ, телефон рақами қуйидаги яқин қариндошлар номида бўлса, банк иловаларидан фойдаланиш мумкин:

• ота-она;

• опа-сингил;

• турмуш ўртоғи;

• фарзанд.

Яъни, яқин қариндошлар ўртасидаги ҳолатларда мазкур тартиб муаммо туғдирмайди.