Доналд Трамп АҚШдан ташқарида йиғиладиган автомобилларга 25 фоизлик бож эълон қилди
Мазкур қарор АҚШнинг маҳаллий автомобиль саноатини қўллаб-қувватлаш ва мустаҳкамлаш мақсадида қабул қилинган. Европа Иттифоқи ва Канада ушбу бож тарифларига кескин эътироз билдирган бўлса, Япония тез орада жавоб тариқасида қарши бож тарифларини жорий этишини маълум қилди.
АҚШ Президенти Доналд Трамп импорт автомобиллари ва уларнинг эҳтиёт қисмларига 25 фоизлик бож тарифлари жорий қилинганини эълон қилди. Бу қарор мамлакат автомобиль саноатини ҳимоя қилиш ҳамда чет элдан иш ўринларини қайтариб олиш мақсадида қабул қилинган.
Оқ уйда сўзга чиққан Трамп ушбу бож тарифлари АҚШда ишлаб чиқаришни ривожлантиришга хизмат қилишини ва янги иш ўринлари яратишини таъкидлади. Унинг сўзларига кўра, чет эл давлатлари АҚШдан жуда кўп нарса олиб кетган, баъзан эса дўст мамлакатлар душмандан ҳам ёмонроқ бўлиб чиққан.
Расмий ҳужжатларга кўра, янги бож тарифлари 2 апрелдан кучга киради. Ушбу чора АҚШ автомобиль саноатини мустаҳкамлаш ва маҳаллий ишлаб чиқарувчиларни қўллаб-қувватлаш учун қабул қилинган.
Бироқ, халқаро ҳамжамият бу қарорни кескин танқид қилмоқда. Европа Иттифоқи Президенти Урсула фон дер Ляен бож тарифларини бизнес учун ёмон, истеъмолчилар учун эса ундан ҳам салбийроқ деб баҳолади.
Канада Бош вазири Марк Карни ушбу қарорни канадалик ишчиларга бевосита ҳужум деб атади. Япония Бош вазири Шигеру Ишиба эса Япония бу бож тарифларига жавобан тегишли чораларни кўришини билдирди.
Мазкур бож солиқлари глобал автомобиль саноатида катта ўзгаришларга сабаб бўлиши мумкин. АҚШ, Мексика ва Канада автомобиль ишлаб чиқарувчилари йиллар давомида божхона тўловларисиз ишловчи таъминот занжирларини шакллантирган эди. АҚШ Савдо вазирлигининг маълумотларига кўра, 2024 йилда мамлакат 214 миллиард долларлик енгил автомобиль импорт қилган. Энг йирик автомобиль экспорт қилувчи давлатлар эса Мексика, Канада, Жанубий Корея, Япония ва Германия ҳисобланади.
Мутахассислар фикрига кўра, ушбу бож тарифлари ортидан АҚШда автомобиль нархлари ошиши, маҳаллий ишлаб чиқарувчилар учун рақобат кучайиши ва импорт автомобиллари танловининг қисқариши кутилмоқда.
