BRB ва Халқ банки давлат улуши сақланадиган банклар рўйхатидан чиқарилди — янгиланган Фискал стратегия
Янги стратегияга кўра, Ўзмиллийбанк, Агробанк ва Микрокредитбанкда давлат иштироки сақлаб қолинади. Ўзсаноатқурилишбанк, Алоқабанк ва Асакабанк халқаро молия институтлари билан ҳамкорликда ислоҳ қилинади, Туронбанкни хусусийлаштириш масаласи кўриб чиқилади. Халқ банки ва Бизнесни ривожлантириш банкининг келгуси тақдири эса ҳужжатда очиқ қолдирилган.
2027–2029 йилларга мўлжалланган Фискал стратегияда банк тизимини ислоҳ қилишнинг асосий йўналишлари белгиланди.
Давлат иштироки устувор равишда Ўзмиллийбанк, Агробанк ва Микрокредитбанкда сақлаб қолинади. Бундан келиб чиқиб, қолган олтита давлат банки — Ўзсаноатқурилишбанк, Асакабанк, Халқ банки, Бизнесни ривожлантириш банки, Алоқабанк ва Туронбанк келгусида хусусийлаштирилиши мумкин.
Ўзмиллийбанк стратегик корхоналар ҳамда инвестиция лойиҳаларига бозор шартлари асосида хизмат кўрсатувчи тизимли аҳамиятга молик муассаса сифатида фаолият юритиши белгиланган.
Шунингдек, қатор давлат банкларини халқаро молия институтлари иштирокида трансформация қилиш ва хусусийлаштириш режалаштирилмоқда. Хусусан, Ўзсаноатқурилишбанк Халқаро молия корпорацияси, Алоқабанк Европа тикланиш ва тараққиёт банки ҳамда Осиё тараққиёт банки, Асакабанк эса ЕТТБ билан ҳамкорликда ислоҳ қилинади.
Туронбанкни эса халқаро консультантларни жалб этган ҳолда хусусийлаштириш масаласини кўриб чиқиш белгиланган. Ҳужжатда мазкур банкларни хусусийлаштиришнинг аниқ муддатлари кўрсатилмаган.
Асакабанк бўйича жараён нисбатан аниқроқ белгиланган. Президентнинг 2026 йил 20 апрелдаги қарори билан банкни хусусийлаштиришга тайёрлаш ва унинг фаолиятини бозор тамойилларига мослаштириш чоралари тасдиқланган. Шунингдек, ЕТТБнинг банкдаги 15 фоиз улушни сотиб олиши бўйича келишув имзоланган.
Халқ банки ва Бизнесни ривожлантириш банки тақдири нима бўлади?
Янги стратегияда давлат улуши сақлаб қолинадиган банклар қаторида Халқ банки ва Бизнесни ривожлантириш банкининг тилга олинмагани уларнинг келгуси тақдири бўйича саволларни келтириб чиқарди.
Иқтисодчи Отабек Бакировнинг қайд этишича, ўтган йилги Фискал стратегияда давлат иштироки сақлаб қолиниши белгиланган банклар қаторида Халқ банки ва Бизнесни ривожлантириш банки ҳам бор эди. Янгиланган стратегияда эса ҳар икки банк ҳақида бирон-бир аниқ кўрсатма берилмаган.
Бакиров, айниқса, мамлакатдаги йирик ва ҳудудий қамрови кенг банклардан бири бўлган Халқ банкининг келажаги бўйича расмий режалар очиқланмаётганига эътибор қаратган.
Йил бошида Халқ банкининг 30 фоизлик акциялар пакети Миллий инвестиция жамғармаси портфелидан ҳам чиқарилган.
Бироқ ҳозирча Халқ банки ва Бизнесни ривожлантириш банкини хусусийлаштириш, улардаги давлат улушини қисқартириш ёки бошқа инвесторга ўтказиш бўйича расмий қарор эълон қилинмаган.
