Бўлажак триллионер: Tesla 2035 йилгача Илон Маскка $1 трлнлик мукофот пакети бериши мумкин
Тўлиқ пакетни қўлга киритиши учун у 10 йил давомида компания қийматини $1,1 трлндан $8,5 трлнгача ошириши ҳамда фойдани $17 млрддан 400 млрдгача кўтариши керак. Бундан ташқари, Маск 1 млн автоном такси ва 1 млн роботни тижоратга чиқариши шарт.
Tesla кузатув кенгаши компания бош директори Илон Маск учун мисли кўрилмаган иш ҳақи пакетини тақдим этди. Агар бу режа амалга ошса, у дунё тарихидаги биринчи триллионерга айланиши мумкин. Бу ҳақда The Wall Street Journal хабар берди.
Дунёнинг энг бой одами ҳисобланган Маск мукофотни тўлиқ қўлга киритиши учун кейинги ўн йил ичида Tesla’нинг бозор қийматини саккиз баробар ошириши лозим. Бу маълумот қимматли қоғозлар бўйича топширилган ҳужжатларда қайд этилган.
Мукофот нақд пулларда эмас, балки Tesla акциялари кўринишида берилади. Режа акциядорлар томонидан маъқулланиши шарт бўлиб, масала 6 ноябрь куни бўлиб ўтадиган йиллик йиғилишда овозга қўйилади.
Янги пакет Илон Маск бойлигини қарийб $900 млрдга ошириши мумкин. Forbes’нинг маълумотига кўра, ҳозирда Маскнинг бойлиги $437 млрдни ташкил этиб, у жаҳоннинг энг бой инсони саналади.
Агар Tesla’нинг бозор қиймати $1,1 трлндан $8,5 трлнгача оширилса, Маск $900 млрдга яқин қўшимча бойлик орттиради. Бу нафақат корпоратив тарихдаги энг катта раҳбарлик мукофоти бўлади, балки Маскнинг компаниядаги улушини қарийб 29 фоизга етказади.
Режа шартларига кўра, Маск мукофотдан фойдаланиши учун камида 7,5 йил Tesla’да қолиши керак, тўлиқ пакетни олиш учун эса 10 йил давомида компанияни бошқариши шарт. Бундан ташқари, у қуйидаги улкан вазифаларни ҳам бажариши керак бўлади:
- 1 миллион автоном таксини тижоратга чиқариш,
- 1 миллион робот ишлаб чиқариш,
- компания фойдасини 24 баробар ошириш.
Режага кўра, Tesla қиймати 2 триллион долларга етганда Маск 35 млн акцияни қўлга киритади. Компания қиймати $8,5 трлнгача ошган сари унга қўшимча акциялар ҳам берилади. Тўлиқ мукофотга эришиш учун эса компания фойдаси $17 млрддан $400 млрдгача кўтарилиши зарур.
Бироқ бу мақсадларга эришиш осон эмас. Чунки дунё бўйлаб бошқа йирик компаниялар ҳам автоном транспорт воситалари ва робототехника устида фаол ишламоқда.
Tesla кузатув кенгаши раиси Робин Денҳолм акциядорларга йўллаган мактубида шундай дейди:
“Илонни компанияда сақлаб қолиш ва уни рағбатлантириш Теслаънинг бу улкан мақсадларга эришишида, ҳамда тарихдаги энг қиммат компанияга айланишида ҳал қилувчи аҳамиятга эга”.
Эслатиб ўтамиз, Маск Tesla’дан ташқари SpaceX, xAI ва ижтимоий тармоқ Х’ни ҳам бошқаради. Янги режа унинг бошқа лойиҳалари ёки сиёсий фаолиятига чеклов қўймайди.
