Беларус банкирлари Ўзбекистон банк ва финтех компанияларида раҳбарлик лавозимларини эгалламоқда
Ўзбекистон банк ва финтех бозорида Беларус банк мактаби вакиллари тобора кўпроқ кўзга ташланмоқда. OfficeLife нашрига кўра, сўнгги йилларда Беларус банк секторида тажриба орттирган бир қатор топ-менежерлар HUMO, Uzum, InfinBANK, Tez ва “Ипотека-банк” каби ташкилотларда муҳим раҳбарлик лавозимларини эгаллаган.
Ўзбекистон молия бозорида сўнгги йилларда рақамли трансформация, тўлов инфратузилмаси ва необанклар ривожи сезиларли тезлашди. Бу жараён маҳаллий банк ва финтех компанияларидан нафақат капитал ва технологик ечимларни, балки мураккаб банк маҳсулотлари, IT-инфратузилма, риск-менежмент, стратегик ривожланиш ҳамда финтех тажрибасига эга кадрларни ҳам талаб қилмоқда.
OfficeLife нашрининг ёзишича, айни шу эҳтиёж фонида Беларусь банк секторида ишлаган бир қатор мутахассислар Ўзбекистон молия бозорида раҳбарлик лавозимларини эгаллай бошлаган. Нашр бунга HUMO, InfinBANK, Uzum, Tez ва Ипотека банк каби ташкилотлардаги сўнгги тайинловларни мисол қилиб келтиради.
HUMO’да Беларусь банк инфратузилмасидан келган мутахассислар бор
Материалда энг сўнгги мисоллардан бири сифатида Александр Сотниковнинг HUMO тўлов тизимига келгани қайд этилган. Сотников аввал Беларусдаги Банк процессинг маркази — Belkart миллий тўлов тизими операторини бошқарган. Май ойида у Ўзбекистондаги йирик тўлов тизимларидан бири бўлган HUMO’да бошқарув раиси ўринбосари лавозимига тайинланган. Кейинчалик HUMO хабарларида у “бошқарув раисининг биринчи ўринбосари” сифатида тилга олинган.
HUMO’да Беларусь банк инфратузилмасида ишлаган бошқа мутахассислар ҳам бор. Хусусан, Елена Бекиш аввал Банк процессинг марказида иқтисодиёт ва молия бўйича бош директор ўринбосари бўлиб ишлаган. Ҳозир эса у HUMO’да стратегик бизнесни ривожлантириш департаменти ижрочи директори лавозимида фаолият юритмоқда.
Тренд фақат тўлов тизимлари билан чекланмаяпти
Беларусь банк тажрибасига эга менежерлар классик банкларда ҳам учрайди. Масалан, Алеся Фролова ҳозир InfinBANK бошқаруви раиси ўринбосари лавозимида ишламоқда. У аввал Беларусь халқ банкида раҳбарлик лавозимларида фаолият юритган.
Рақамли банк хизматлари йўналишида ҳам шундай мисоллар бор. Александр Филиппович Hamkorbank томонидан бозорга чиқарилган Tez мобил иловасининг CEO’си ҳисобланади. Hamkorbank сайтида ҳам Tez рақамли офисига раҳбар сифатида Александр Филиппович кўрсатилган.
Филиппович аввал Uzum Bank’да операцион директор ва бошқарув раиси лавозимларида ишлаган. Бунгача эса у Беларусь банк секторида 20 йилдан ортиқ тажриба орттирган, жумладан Belinvestbank, Delta Bank ва BNB-Bank’да юқори лавозимларда фаолият юритган.
Uzum ва Ипотека банкда ҳам беларуслик экспатлар мавжуд
Uzum экотизимида ҳам Беларусь банк ва консалтинг мактаби вакиллари бор. Компаниянинг молиявий директори Никита Гуляев Беларусдан келган. У Ўзбекистонга келишидан олдин қарийб тўққиз йил Alfa-Bank Belarus’да ишлаган, ундан аввал эса EY ва PwC’нинг Беларусь офисларида фаолият юритган.
Uzum 2024 йилда $1 млрддан юқори баҳоланишга эришиб, Ўзбекистоннинг биринчи “яккашох” технологик компаниясига айланганини эълон қилган. Компания ўзини электрон тижорат, етказиб бериш, банк ва финтех хизматларини бирлаштирган рақамли экотизим сифатида таърифлайди.
Чет эл капитали иштирокидаги банкларда ҳам Беларусь тажрибасига эга мутахассислар учрайди. Дмитрий Волчек Ипотека банкда бошқарув раиси ўринбосари ва ахборот технологиялари блоки раҳбари лавозимида ишлайди. У фаолиятини 1998 йилда Беларусь Миллий банкида бошлаган, кейинчалик Priorbank, Bank Dabrabyt ва WebPay’да IT йўналишларини бошқарган.
