Банкирдан ўқитувчигача: Ўзбекистонда турли соҳалар бўйича ўртача иш ҳақи қанча?
2025 йилнинг январь–сентябрь ойларида Ўзбекистонда ўртача ойлик номинал иш ҳақи 6,17 млн сўмни ташкил этди. Миллий статистика қўмитаси маълумотларига кўра, иш ҳақларининг йиллик ўсиш суръати 19,2 фоизни ташкил қилди. Энг юқори маош Тошкент шаҳри ҳамда ахборот-коммуникация ва молия тармоқларида қайд этилган.
Жорий йилнинг январь–сентябрь ойларида Ўзбекистонда ўртача ойлик номинал ҳисобланган иш ҳақи 6 млн 166,9 минг сўмни ташкил этди. Миллий статистика қўмитаси маълумотларига кўра, бу кўрсаткич 2024 йилнинг шу даврига нисбатан 19,2 фоизга ўсган.
Ҳудудлар бўйича вазият
Ҳудудлар кесимида энг юқори ўртача иш ҳақи Тошкент шаҳрида қайд этилди. Бу ерда иш ҳақи 10,38 млн сўмни ташкил этиб, йиллик ўсиш суръати 18,7 фоиз бўлган. Ундан кейинги ўринларда 7,61 млн сўм билан Навоий вилояти ва 5,80 млн сўм билан Тошкент вилояти жойлашган.
Энг паст ўртача иш ҳақи Сурхондарё ва Қашқадарё вилоятларида кузатилган.
| № | Ҳудуд | Ўртача иш ҳақи | Йиллик ўсиш |
| 1 | Тошкент шаҳри | 10 379 600 сўм | 18,7% |
| 2 | Навоий вилояти | 7 612 300 сўм | 15,1% |
| 3 | Тошкент вилояти | 5 803 400 сўм | 17,3% |
| 4 | Андижон вилояти | 4 996 500 сўм | 12% |
| 5 | Бухоро вилояти | 4 953 100 сўм | 18,2% |
| 6 | Сирдарё вилояти | 4 930 800 сўм | 20,7% |
| 7 | Қорақалпоғистон Республикаси | 4 757 200 сўм | 17,6% |
| 8 | Самарқанд вилояти | 4 853 300 сўм | 24,8% |
| 9 | Хоразм вилояти | 4 833 700 сўм | 17,6% |
| 10 | Жиззах вилояти | 4 589 100 сўм | 19,2% |
| 11 | Фарғона вилояти | 4 574 500 сўм | 19,8% |
| 12 | Наманган вилояти | 4 543 800 сўм | 20,9% |
| 13 | Сурхондарё вилояти | 4 374 200 сўм | 18,4% |
| 14 | Қашқадарё вилояти | 4 270 800 сўм | 17,2% |
Тармоқлар бўйича иш ҳақи
Ахборот ва алоқа соҳасида эса иш ҳақи 14,98 млн сўмга етган бўлиб, ўсиш суръати 16,6 фоиз бўлган.
Энг юқори йиллик ўсиш санъат, кўнгилочар ва дам олиш хизматлари фаолиятида кузатилди. Ушбу йўналишда ўртача ойлик иш ҳақи 5,11 млн сўмга тенг бўлиб, ўсиш 22,8 фоизни ташкил этди.
Ахборот ва алоқа йўналишлари бўйича:
- Компьютер дастурлаштириш, маслаҳат бериш ва бошқа ёрдамчи хизматлар: 19,99 млн сўм
- Ахборот хизматлари кўрсатиш: 18,6 млн сўм
- Алоқа соҳасида: 11,76 млн сўм
Банк, суғурта, лизинг, кредит ва воситачилик йўналишлари бўйича:
- Мажбурий ижтимоий суғурталашдан ташқари, қайта суғурталаш ва нафақа жамғармалари: 20,97 млн сўм
- Молиявий хизматлар кўрсатиш ва суғурталаш бўйича ёрдамчи фаолият: 18,14 млн сўм
- Суғурталаш ва нафақа таъминотидан ташқари молиявий хизматлар: 16,46 млн сўм
Таълим соҳасида:
Таълим соҳасида ўртача ойлик иш ҳақи 4,19 млн сўмни ташкил қилган.
- Олий таълим: 9,5 млн сўм
- Техник ва профессионал таълим: 4,26 млн сўм
- Умумий ўрта таълим: 4,14 млн сўм
- Мактабгача таълим: 2,77 млн сўм
