АҚШда ChatGPT маслаҳатлари туфайли ўсмир ўз жонига қасд қилди деган айблов билан OpenAI судга берилди
Сан-Франсиско судида рўйхатга олинган даъвода Калифорниялик ота-она OpenAI ва Сэм Альтманни фарзандининг ўлимида айбламоқда. Уларнинг иддаосига кўра, ChatGPT хавфли маслаҳатлар бериб, 16 ёшли ўсмирнинг аҳволини янада оғирлаштирган.
Калифорнияда 16 ёшли Адам Рейннинг ўлими юзасидан ота-онаси OpenAI ва компания раҳбари Сэм Альтман устидан судга даъво киритди. Бу ҳақда Reuters хабар берди.
Даъвода таъкидланишича, ChatGPT узоқ давом этган мулоқотларда хавфли маслаҳатлар берган ва бу ўсмирнинг руҳий ҳолатини янада оғирлаштирган. Иш 26 август куни Сан-Франсиско штат судида рўйхатга олинган. Даъвогарларга кўра, вақт ўтиши билан ChatGPT хавфсизлик чекловларини айланиб ўтувчи жавоблар қайтаришни бошлаган.
OpenAI ўз баёнотида, баъзи ҳолларда узун суҳбатларда ҳимоя механизмлари сусайиши мумкинлигини тан олди ва бу борада янгиланишлар устида ишлаётганини маълум қилди. Компания ҳодисадан чуқур афсусда эканини билдириб, ChatGPT хавфсизлик чораларини янада кучайтиришини қўшимча қилди.
Хусусан, қуйидаги ўзгаришлар режалаштирилмоқда:
- узоқ суҳбатларда хавфсизлик ҳимояларини мустаҳкамлаш;
- руҳий танглик белгиларини эрта аниқлаш ва хавфни камайтириш;
- фавқулодда хизматларга тезкор уланиш имконини яратиш;
- фойдаланувчиларни сертификатланган мутахассисларга улаш имкониятини жорий этиш;
- ўсмирлар учун ота-оналар назоратини кучайтириш.
Мутахассислар фикрича, мазкур суд жараёни генератив сунъий интеллектнинг нозик вазиятлардаги жавобгарлигини аниқлаш бўйича муҳим ҳуқуқий тажриба бўлиши мумкин.
OpenAI эса чат-ботлардан профессионал психологик ёрдам ўрнида эмас, балки хавфсиз йўналтирувчи восита сифатида фойдаланиш кераклигини таъкидламоқда.
