Apple iPhone’ларга ChatGPT’ни интеграция қилди
Siri эндиликда сўровларга жавоб беришда ChatGPT дан фойдаланади.
Apple компанияси сунъий интеллект технологияларидан фойдаланишни кенгайтириш мақсадида ChatGPT чатботини ўз қурилмаларига интеграция қилишни бошлади, дея хабар берди Reuters. Ушбу янгилик компаниянинг сўнгги iPhone моделлари савдосини оширишга хизмат қилиши кутилмоқда.
Бу янгилик iPhone, iPad ва Mac қурилмалари учун операцион тизимларнинг сўнгги янгиланишлари доирасида жорий қилинаётган кенг қамровли сунъий интеллект хусусиятларининг бир қисмидир.
Асосий ўзгаришлар
Июнда эълон қилинган Apple Intelligence функциялари доирасида,эндиликда Siri овозли ёрдамчиси сўровларга жавоб беришда ChatGPT имкониятларидан фойдаланади. Янгиланиш Siri’га фотосуратлар ва ҳужжатларни (масалан, тақдимотлар) таҳлил қилиш ва уларга оид саволларга жавоб бериш каби функцияларни қўшади. Овозли ёрдамчининг мазкур функциялар ҳозирча фақат инглиз тилида мавжуд
Фойдаланувчилар, шунингдек, Янги Writing Tools функцияси орқали ChatGPT’дан иловаларда матн ёзишда фойдаланиши ва ChatGPT ёрдамида тасвирлар яратиши ҳамда уларни лойиҳаларга қўшиши мумкин.
Кимлар учун мавжуд?
Янги сунъий интеллект хусусиятлари қуйидаги қурилмаларда мавжуд бўлади:
- iPhone: iPhone 16 ҳамда iPhone 15 Pro ва Pro Max моделлари
- iPad: А17 Pro ёки М1 чипга эга моделлар ва ундан кейингилар
- Mac: М1 чипли компьютерлар ва ундан кейингилар
Ушбу AI хусусиятлари Apple учун йилнинг энг даромадли даври – байрам мавсумида ишга туширилмоқда. Шунга қарамай, Apple Intelligence функцияларининг бошқа минтақаларда аста-секин жорий этилиши iPhone 16 линияси савдо натижаларига таъсир ўтказиши мумкин.
