Apple 599 долларлик MacBook Neo ноутбукини тақдим этди
Apple янги бюджет тоифасидаги MacBook Neo ноутбукини тақдим этди.
Қурилма A18 Pro чипи, 13 дюймли Liquid Retina дисплей, 8 GB оператив хотира ва 256 GB SSD билан жиҳозланган бўлиб, бошланғич нархи $599 этиб белгиланди.
Бу М5 чипли MacBook Аиръга ($1 099) нисбатан 500 долларга анча арзон.
Кеча Apple бюджет тоифа учун мўлжалланган янги ва арзон MacBook Neo ноутбукини эълон қилди.
Эндиликда Apple ноутбукига эга бўлиш учун $1,099 турадиган MacBook Air моделини сотиб олиш шарт эмас. Янги MacBook Neo нархи $599 (£599) дан бошланади, таълим учун бериладиган Apple чегирмаси билан эса $499 га тушади.
Chromebook ва арзон Windows ноутбукларига рақобатчи сифатида ишлаб чиқилган MacBook Neo Apple’нинг одатий М-серияли чипларига асосланмаган. Apple’нинг янги MacBook Air ва MacBook Pro моделлари М-серияли чиплардан фойдаланса, MacBook Neo 2024 йилда тақдим этилган iPhone 16 Pro даги A18 Pro чипи билан ишлайди.
Ушбу чип 6 ядроли CPU (2 та юқори унумдорлик ядроси ва 4 та энергия тежамкор ядро) ҳамда 5 ядроли GPU’га эга. Таққослаш учун, янги MacBook Air даги М5 чипи 10 ядроли CPU (4 та юқори унумдорлик ядроси ва 6 та энергия тежамкор ядро) ҳамда 8 ёки 10 ядроли GPU билан жиҳозланган.
Нархни пастроқ сақлаш мақсадида MacBook Neo’га 13 дюймли дисплей ўрнатилган. Бу энг кичик MacBook Air’даги 13,6 дюймли экрандан бироз кичикроқ. Аввалги миш-мишларда Apple’нинг бюджет MacBook модели 12 дюймли экран билан чиқиши айтилган эди. Қурилма Liquid Retina дисплей билан жиҳозланган бўлиб, 2408×1506 пиксел аниқликка эга. Дисплей ёрқинлиги 500 нит бўлиб, очиқ ҳавода ҳам фойдаланиш имконини беради.
Бошланғич MacBook Neo модели 8 GB оператив хотира ва 256 GB SSD билан тақдим этилади. Бу MacBook Air бошланғич моделидаги хотира ва сақлаш ҳажмидан икки баравар кам.
Оператив хотирани янгилаш имконияти йўқ, аммо сақлаш ҳажмини 512 ГБ га ошириш мумкин. Бу $100 қўшимча нархга тушади ва шу билан бирга клавиатурага Touch ID функцияси қўшилади. Neo моделида мавжуд янгиланиш имконияти шу билан чекланади.
MacBook Neo бир нечта рангларда тақдим этилади: блуш (пушти), citrus (сариқ), индиго (тўқ кўк) ва кумуш. Ранглар нисбатан сокин кўринишда.
Портлар ҳам минимал даражада. MacBook Air даги тезкор Thunderbolt 4 портлари ўрнига Neo моделида икки дона USB-C порт мавжуд: бири 10 Гбпс тезликдаги USB 3, иккинчиси 480 Мбпс тезликдаги USB 2. Шунингдек, қулоқчин учун аудио порт ҳам мавжуд.
Клавиатура орқа ёритишсиз ишлаб чиқилган.
MacBook Neo учун олдиндан буюртма бериш аллақачон бошланган. Қурилма 11 мартдан бошлаб етказиб берила бошлайди.
