Apple 2026 йилда биринчи букланадиган iPhone’ни тақдим этади —Bloomberg
Қурилма Android букланадиган телефонлар каби китоб шаклида очилиб, ёпиқ ҳолатда оддий iPhone каби ишлайди. Янги модель тўртта камера, Touch ID, C2 модем ва 8 дюймли ички экран билан жиҳозланади.
Bloomberg журналисти Марк Гурман Apple ҳозирда ишлаб чиқаётган биринчи букланадиган iPhone ҳақида муҳим тафсилотларни очиқлади.
Дизайн ва экран
Гурманнинг ёзишича, янги iPhone Android’даги букланадиган смартфонлар каби китоб шаклида очилади. Ёпиқ ҳолатда у оддий iPhone сингари ишлайди, ташқи экранининг ўлчами 5–6 дюйм бўлади. Қурилма очилганда эса катта, 8 дюймли ички дисплей пайдо бўлади.
Камера тизими
Букланадиган iPhone жами тўртта камера билан жиҳозланади:
- олд экранда 1 та камера,
- ички экранда 1 та камера,
- орқа панелда эса 2 та камера.
Орқа камералар орасида юқори аниқликдаги асосий камера ҳамда қўшимча ултра-кенг ёки телефото линза бўлиши кутилмоқда. Ички экран очилганда ишлайдиган камера эса селфи ва видеоқўнғироқлар учун асосий восита бўлади.
Face ID ўрнига Touch ID
Apple ушбу моделда Face ID ўрнига ён тугмачадаги Touch ID’ни қўллашга қарор қилган. Сабаби – қурилманинг жуда юпқа бўлиши. Букланадиган iPhone ёпиқ ҳолатда атиги 9,5 мм қалинликка эга бўлади. Бу Apple тарихидаги энг юпқа iPhone бўлади. Шу сабабли Face ID учун керак бўладиган мураккаб TrueDepth тизимини жойлаштиришнинг имкони йўқ.
eSIM
Янги моделда Апплеънинг ўзида ишлаб чиқилган C2 модеми ишлатилади. Бу модем юқори тезликда алоқа имкониятини беради ва СИМ-карта уясисиз ишлайди. Шунга кўра, 2025 йилдаги iPhone 17 Air ва 2026 йилдаги букланадиган iPhone глобал бозорларда ҳам SIM-картасиз фақат eSIM орқали ишлайди.
Нарх ва ранглар
Bloomberg маълумотларига кўра, Apple букланадиган iPhone’ни фақат қора ва оқ рангларда тақдим этади. Ишлаб чиқарувчилар келаси йил бошида оммавий ишлаб чиқаришни бошлайди, сотув эса 2026 йил кузига мўлжалланган.
Нарх борасида эса, Android букланадиган смартфонлари ҳозирда одатда 1800 доллардан юқори туради. Apple бундан арзонроқ нарх белгилашини кутиш мушкул.
Аввалроқ Pinkod янги iPhone 17 линияси ҳақида мавжуд барча маълумотларни бир жойга тўплаган эди:
