Alif финтех компанияси Ўзбекистонда банк лицензиясини олишга тайёрланмоқда
“Евроосиё банки”нинг лицензияси Марказий банк томонидан чақириб олингач Ўзбекистонда жами банклар сони 35 тага тушган эди.
Alif Uzbekistan финтех компанияси мамлакатда банк лицензиясини олишни режалаштирмоқда. Бу ҳақда Pik Skartarisa канали хабар берди.
Буюк Британияда рўйхатдан ўтган Alif Capital Holdings Limited директорлар кенгаши Ўзбекистонда банк тузиш ташаббусини маъқуллаган. Компания яқин кунларда Марказий банкка лицензия олиш учун барча зарур ҳужжатларни тақдим этишни мўлжалламоқда.
Alif Uzbekistan ўзининг расмий Телеграм-каналида кенг кўламли инвестициялар жалб қилинаётгани, кичик ва ўрта бизнесни қўллаб-қувватлаш ҳамда банк ташкил этишга интилаётганини маълум қилди.
Alif компанияси 2014 йилда Тожикистонда ташкил этилган. 2019 йилдан бошлаб эса Ўзбекистон бозорига илк лойиҳаси — Alif Shop интернет-маркетплейси орқали кириб келди. Бир йил ўтиб, “Алоқабанк” билан ҳамкорликда alif.mobi тўлов хизмати ва электрон пул тизимини ишга туширди.
Сўнгги икки ярим йил ичида Ўзбекистонда бирорта ҳам янги банк ташкил этилмади. Охирги маротаба банк лицензиясини олган “Евроосиё банки”нинг рухсатномаси эса 27 август куни Марказий банк томонидан чақириб олинди. Натижада мамлакатдаги фаол банклар сони 35 тага тушди.
