Албания коррупцияга қарши курашиш учун сунъий интеллектни вазир этиб тайинлади

Албания ҳукумати тарихда илк бор сунъий интеллект ботини вазирлик лавозимига тайинлади. Бу ҳақда Reuters хабар берди.

Diella деб аталадиган бу виртуал вазир давлат тендерларини бошқаради ва хусусий компаниялар билан тузиладиган шартномаларни тақсимлайди.

Бош вазир Эди Рамага кўра, Diella пора ёки таҳдидларга берилмайди ва шу йўл билан давлат харидларида юз берадиган коррупцияни бутунлай йўқ қилиш мақсад қилинган.

Албанияда тендерлар соҳасида коррупция муаммоси узоқ йиллардан бери мавжуд. Мамлакат Болқон минтақасида гиёҳванд моддалар ва қурол савдосидан тушган пулларни “ювувчи” жиноий гуруҳлар маркази сифатида танилган. Шу сабабли Албаниянинг Европа Иттифоқига қўшилиш жараёни ҳам қийинлашиб келмоқда.

Ҳукумат ҳозирча Diella устидан қандай инсоний назорат бўлиши, уни манипуляция қилиш хавфлари қандай олди олиниши ҳақида изоҳ бермади.

Аслида Diella  йил бошида e-Albania рақамли платформасида виртуал ёрдамчи сифатида иш бошлаган эди. У анъанавий албан кийимида тасвирланади, фуқаролар ва тадбиркорлик субъектларига овозли буйруқлар орқали хизмат кўрсатади. 

Бот электрон муҳр билан ҳужжатлар чиқаради ва шу орқали бюрократик кечикишларни камайтиради. Энди эса у ҳукумат даражасига кўтарилиб, давлат харидларини бошқариш вазифасини олди.

Лекин ҳамма ҳам бунга ишонмаяпти. Ижтимоий тармоқларда фойдаланувчилардан бири “Албанияда ҳатто Diella ҳам коррупцияга ботади” деб ёзди. Яна бири эса “Ўғрилик барибир давом этади, айб эса Diella'га юкланади” деб ҳазиллашди.