Аҳоли банкларга сотган валютаси харид қилганидан қарийб икки баравар кўп бўлди
2026 йилнинг январь–май ойларида Ўзбекистонда чет эл валютасига талаб 25,7 млрд долларга етди. Бироқ валюта таклифи талабдан тезроқ ўсди, аҳоли эса банкларга харид қилганидан қарийб 4,7 млрд доллар кўпроқ валюта сотди.
Марказий банк маълумотларига кўра, жорий йилнинг дастлабки беш ойида юридик ва жисмоний шахсларнинг чет эл валютасига бўлган жами талаби 25,7 млрд долларни ташкил этди. Бу 2025 йилнинг мос даврига нисбатан 20,1 фоизга кўп.
Шу даврда ички бозордаги валюта таклифи эса 28,6 фоизга ошиб, 22,3 млрд долларга етди. Яъни таклиф талабга қараганда тезроқ ўсган.
Натижада талаб ва таклиф ўртасидаги фарқ 3,36 млрд долларни ташкил этди. Бир йил аввал бу тафовут 4,02 млрд доллар бўлган. Шу тариқа, бозордаги валюта танқислиги бир йилда қарийб 16,5 фоизга қисқарган.
Аҳоли валютанинг соф сотувчиси бўлди
Энг эътиборли кўрсаткичлардан бири аҳоли банкларга сотган валюта миқдори харид қилганидан анча кўп бўлганидир.
Январь–май ойларида жисмоний шахслар банклардан 5,5 млрд доллар харид қилган, тижорат банкларига эса 10,2 млрд доллар сотган. Демак, аҳоли сотган валюта харид қилганидан қарийб 1,9 баравар кўп бўлган.
Аҳолининг валюта сотиш ва харид қилиш операциялари ўртасидаги фарқ 4,7 млрд долларни ташкил этди. Бу аҳоли ички валюта бозорида соф валюта етказиб берувчи бўлиб қолаётганини англатади.
Бир йил ичида аҳолининг банкларга сотган валютаси 7,4 млрд доллардан 10,2 млрд долларга, яъни қарийб 39 фоизга ошган. Аҳолининг валюта хариди эса 4,3 млрд доллардан 5,5 млрд долларга кўпайган.
Корхоналар 8 млрд доллардан ортиқ соф валюта харид қилди
Юридик шахслар эса, аксинча, валютанинг асосий харидорлари бўлиб қолмоқда.
Корхоналар беш ойда 20,2 млрд доллар харид қилган ва 12,1 млрд доллар сотган. Натижада юридик шахсларнинг соф валюта талаби қарийб 8,1 млрд долларни ташкил этди.
Умумий ҳисобда аҳолининг 4,7 млрд долларлик соф валюта таклифи корхоналарнинг валютага бўлган талабининг катта қисмини қоплаган.
Курс йил бошидаги даражасида қолди, аммо тебраниш кучайди
Январь–май ойларида доллар курси 11 938 сўмдан 12 320 сўмгача бўлган диапазонда ўзгарди. Давр якунида курс йил бошидаги даражасига нисбатан деярли ўзгаришсиз қолган.
Шунга қарамай, курснинг ўртача икки томонлама тебранувчанлиги 30 сўм ёки 0,25 фоизни ташкил этди. 2025 йилнинг мос даврида бу кўрсаткич 17,3 сўм ёки 0,13 фоиз бўлган.
Демак, доллар курси беш ой якунида деярли ўзгармаган бўлса-да, унинг кунлик тебранишлари бир йил ичида қарийб икки баравар кучайган.
