2026 йилнинг биринчи ярмида Ўзбекистон банкларидаги NPL ҳажми 27,1 фоизга ошди
2026 йилнинг биринчи ярмида Ўзбекистон банкларидаги муаммоли кредитлар ҳажми 4,89 трлн сўмга кўпайиб, 22,94 трлн сўмга етди.
Энг катта ўсиш Микрокредитбанк, Халқ банки ва Агробанкда кузатилди.
Муаммоли кредитларнинг кредит портфелидаги улуши бўйича эса TBC Bank 12,1 фоиз билан энг юқори кўрсаткични қайд этди.
Биринчи ярим йиллик якунида Ўзбекистон банклари кредит портфели 642,81 трлн сўмга етди. Ўсиш 38,81 трлн сўм ёки 6,4 фоизни ташкил этди.
Шу даврда муаммоли кредитлар 4,89 трлн сўм ёки 27,1 фоизга кўпайиб, 22,94 трлн сўмга чиқди. Яъни NPL ҳажми умумий кредит портфелига қараганда тўрт баравардан тезроқ ўсган. Натижада унинг жами кредитлардаги улуши 3 фоиздан 3,6 фоизгача кўтарилди.
Давлат улуши мавжуд банкларнинг муаммоли кредитлари ярим йилликда 3,61 трлн сўмга ошиб, 16,45 трлн сўмга етди. Бу банк тизимидаги жами NPLнинг 71,7 фоизига тенг.
Айни пайтда давлат банклари мамлакат кредит портфелининг 65,7 фоизини эгаллайди. Яъни уларнинг муаммоли кредитлардаги улуши кредит бозоридаги улушидан 6 фоиз пунктга юқори.
Хусусий ва хорижий банкларнинг NPL ҳажми эса 1,28 трлн сўмга ошиб, 6,50 трлн сўмни ташкил этди. Ушбу гуруҳда муаммоли кредитларнинг жами кредитлардаги улуши 2,9 фоизга тенг.
Энг катта ўсиш Микрокредитбанкда
Ярим йилликда муаммоли кредитлар энг кўп Микрокредитбанкда ошган. Банкнинг NPL ҳажми 894 млрд сўмдан 1,80 трлн сўмга етди. Ўсиш 902 млрд сўм ёки 100,9 фоизни ташкил этди.
Кейинги ўринларни Халқ банки ва Агробанк эгаллади. Халқ банкидаги муаммоли кредитлар 501 млрд сўмга, Агробанкда эса 493 млрд сўмга кўпайган.
| Банк | Кредит портфели | NPL ҳажми | Йил бошидан ўзгариш |
|---|---|---|---|
| Микрокредитбанк | 22,84 трлн сўм | 1,80 трлн сўм | +902 млрд сўм |
| Халқ банки | 37,40 трлн сўм | 1,53 трлн сўм | +501 млрд сўм |
| Агробанк | 91,21 трлн сўм | 3,19 трлн сўм | +493 млрд сўм |
| Анорбанк | 12,14 трлн сўм | 901 млрд сўм | +422 млрд сўм |
| TBC Bank | 8,32 трлн сўм | 1,01 трлн сўм | +418 млрд сўм |
| Бизнесни ривожлантириш банки | 25,78 трлн сўм | 1,49 трлн сўм | +376 млрд сўм |
| Асакабанк | 40,43 трлн сўм | 1,87 трлн сўм | +372 млрд сўм |
| Ўзсаноатқурилишбанк | 60,99 трлн сўм | 1,99 трлн сўм | +345 млрд сўм |
| Алоқабанк | 21,65 трлн сўм | 782 млрд сўм | +305 млрд сўм |
| Ипак йўли банк | 18,75 трлн сўм | 405 млрд сўм | +225 млрд сўм |
Биринчи бешта банкдаги ўсишнинг ўзи 2,74 трлн сўмни ташкил этди. Бу банк тизимидаги соф ўсишнинг қарийб 56 фоизига тенг.
Айрим банкларда ўсиш суръати юқорироқ бўлган. Жумладан, Orient Finance банкдаги NPL 21 млрд сўмдан 224 млрд сўмга, Universal bankда эса 11 млрд сўмдан 49 млрд сўмга ошган.
Қайси банкларда NPL камайди?
Йил бошидан муаммоли кредитлар ҳажмини энг кўп Капиталбанк камайтирган. Банкдаги NPL 1,02 трлн сўмдан 822 млрд сўмга тушди. Камайиш 198 млрд сўм ёки 19,4 фоизни ташкил этди.
Ипотека-банкдаги муаммоли кредитлар эса 164 млрд сўмга қисқариб, 1,09 трлн сўмни ташкил қилган.
| Банк | 1 январь | 1 июль | Камайиш |
|---|---|---|---|
| Капиталбанк | 1 020 млрд сўм | 822 млрд сўм | −198 млрд сўм |
| Ипотека-банк | 1 257 млрд сўм | 1 093 млрд сўм | −164 млрд сўм |
| Пойтахт банк | 69 млрд сўм | 37 млрд сўм | −32 млрд сўм |
| Ziraat Bank Uzbekistan | 84 млрд сўм | 72 млрд сўм | −12 млрд сўм |
| Ҳаёт банк | 186 млрд сўм | 183 млрд сўм | −3 млрд сўм |
Энг катта муаммоли кредитлар қайси банкларда?
Мутлақ миқдорда энг катта муаммоли кредит портфели Ўзмиллийбанкда сақланиб қолмоқда — 3,21 трлн сўм. Агробанк 3,19 трлн сўм билан ундан атиги 17 млрд сўм ортда турибди.
| Банк | NPL ҳажми |
|---|---|
| Ўзмиллийбанк | 3,21 трлн сўм |
| Агробанк | 3,19 трлн сўм |
| Ўзсаноатқурилишбанк | 1,99 трлн сўм |
| Асакабанк | 1,87 трлн сўм |
| Микрокредитбанк | 1,80 трлн сўм |
| Халқ банки | 1,53 трлн сўм |
| Бизнесни ривожлантириш банки | 1,49 трлн сўм |
| Ипотека-банк | 1,09 трлн сўм |
| TBC Bank | 1,01 трлн сўм |
| Анорбанк | 901 млрд сўм |
Ушбу ўнта банк ҳиссасига тизимдаги жами муаммоли кредитларнинг қарийб 84 фоизи тўғри келади.
NPL улуши энг юқори банк — TBC Bank
Муаммоли кредитларни банкнинг умумий кредит портфелига нисбатан ҳисоблаганда энг юқори кўрсаткич TBC Bank’да қайд этилган. Банкда NPL улуши 12,1 фоизни ташкил этган. Йил бошида бу кўрсаткич 5,7 фоиз эди.
Кейинги ўринларда 7,9 фоиз билан “Микрокредитбанк”, 7,4 фоиз билан “Анорбанк”, 7,3 фоиз билан “Пойтахт банк”, 6,8 фоиз билан AVO bank ва 6,7 фоиз билан Garant bank жойлашган.
KDB Bank Ўзбекистон, Octobank ва Uzum bankда муаммоли кредитлар қайд этилмаган.
