Микрокредитбанк биринчи чоракдаги соф фойдаси 277 фоизга ўсди
Банк январь-март ойларида 24 миллиард сўм соф фойда қайд этди. Бу кўрсаткич ўтган йилнинг шу даврига нисбатан 277,1 фоизга ошган.
Микрокредитбанк 2025-йилнинг январь-март ойларига оид молиявий ҳисоботини эълон қилди. Ҳисоботга кўра, банк чорак якунида 24 миллиард сўм соф фойда қайд этди.
Банкнинг жами активлари ҳозирда 26,2 триллион сўмни ташкил қилмоқда. Бу кўрсаткич йил бошига нисбатан қарийб 2,7 триллион сўмга ошган. Банк мажбуриятлари ҳам 2,6 триллион сўмга кўпайиб, 22,6 триллион сўмга етди.
Молиявий натижаларга кўра, Микрокредитбанк ушбу даврда 1,1 триллион сўмлик фоизли даромад олган. Соф фоизли даромад эса 312,6 миллиард сўмни ташкил этди. Фоизсиз даромадлар миқдори эса 129,8 миллиард сўмни ташкил қилган.
Оператив харажатлардан аввал банкнинг соф даромади 361 миллиард сўмни ташкил этди. Ходимларга тўланган ойлик маош учун 126,4 миллиард сўм сарфланган. Шунингдек, банк давлат бюджетига 1,5 миллиард сўм миқдорида даромад солиғи тўлаган.
Барча харажатлар чегирилгач, Микрокредитбанк 24 миллиард сўм соф фойда қайд этди. Бу кўрсаткич ўтган йилнинг шу давридаги 6,4 миллиард сўмлик фойдага нисбатан 277,1 фоизга ошган.
