Олмалиқ конь-металлургия комбинати биринчи чоракда қарийб 2 трлн сўм соф фойда олди
Марказий банкнинг амалдаги курси бўйича бу кўрсаткич 154 миллион АҚШ долларини ташкил қилади.
Корхонанинг соф фойдаси ўтган йилнинг шу даврига нисбатан 34,3 фоизга ёки 507,6 миллиард сўмга ошган.
Олмалиқ конь-металлургия комбинати(ОКМК) 2025 йил биринчи чораги бўйича молиявий ҳисоботини тақдим қилди. Унга кўра, комбинат дастлабки уч ойликни қарийб 2 млрд сўмлик соф фойда билан якунлаган. Марказий банкнинг амалдаги курси бўйича бу кўрсаткич қарийб 153,8 миллион АҚШ долларини ташкил қилади.
Ҳисоботга кўра, корхонанинг соф фойдаси ўтган йилнинг шу даврига нисбатан 34,3 фоизга ёки 507,6 миллиард сўмга ошган.
ОКМК балансидаги жами активлар 78 триллион сўмга етган бўлиб, чорак бошидан буён 4,9 триллион сўмга кўпайган. Компаниянинг тақсимланмаган фойдаси эса 12 триллион сўмни ташкил қилмоқда.
Шунингдек, маҳсулотларни сотишдан тушган соф даромад ҳам сезиларли даражада ошган. У 2024 йилнинг шу даврига нисбатан 36,7 фоизга кўпайиб, 9,1 триллион сўмни ташкил этди. Бироқ даромаддаги бундай ўсишга қарамай, компания ушбу чоракда ўтган йилнинг шу даврига нисбатан икки баробар кам даромад солиғи тўлаган. Жами даромад солиғи миқдори 453 миллиард сўмни ташкил қилган.
Умуман олганда, барча харажатлар чегириб ташлангач, ОКМК 2025 йилнинг биринчи чорагини 1 триллион 987 миллиард сўмлик соф фойда билан якунлаган.
