Instagram дўстлар учун умумий Reels лентасини ишга туширди
Янги функция Blend деб номланиб, у орқали икки фойдаланувчининг қизиқишларига мос умумий Reels лентаси шакллантирилади.
Instagram фойдаланувчиларга ўзлари ва дўстлари учун қизиқишларга мослаштирилган Reels лентасини яратиш имконини берувчи янги функция — Blend’ни тақдим этди. Бу ҳақда The Verge хабар берди.
Янги функцияни фаоллаштириш учун фойдаланувчи Instagram даги чат бўлимига кириб, юқори қисмда жойлашган аудио ва видео қўнғироқлар тугмалари ёнидаги эможилар белгисини босиши керак. Таклиф юборилгач, суҳбатдош уни қабул қилса, Blend функцияси ишга тушади.
Blend икки фойдаланувчининг қизиқишларига асосланган Reels видеоларини махсус алгоритм ёрдамида танлаб тавсия қилади. Лента “Умумий микс” яратилган фойдаланувчи ва дўст учун мўлжалланган видеороликлардан ташкил топади. Ҳар бир видео тавсиянома ва йўриқнома билан бирга тақдим этилади.
Ушбу функция орқали фойдаланувчилар ўзаро шахсий Reels маконида контентни томоша қилиш, баҳам кўриш ва фикр алмашиш имконига эга бўладилар. “Микслар” фақат таклиф асосида, яъни бир дўст ёки гуруҳ чатидаги иштирокчилар билан яратилади. Ҳар бир аралаш лента ҳар куни янгиланади ва ҳар бир чат ўзига хос Reels лентасига эга бўлади.
Instagram раҳбари Адам Моссерининг таъкидлашича, бу янгилик фойдаланувчиларга ўз қизиқишларини дўстлари билан баҳам кўриш, уларга яқинроқ бўлиш ва янги суҳбатларга замин яратиш имконини беради.
Бундан ташқари, фойдаланувчи Blend лентасидаги видеони ўз реакцияси ёки изоҳи билан шахсий суҳбатга юбориши ҳам мумкин. Бундай ҳолатда Instagram сизга махсус билдиришнома юборади.
