Тошкент супермаркетларидаги баъзи озиқ-овқат маҳсулотлари нархи арзонлади

Макроиқтисодий ва ҳудудий тадқиқотлар институти (МҲТИ) томонидан 2025 йил март ойида Тошкент шаҳридаги йирик супермаркетларда 21 турдаги асосий озиқ-овқат маҳсулотлари нархлари мониторинги ўтказилди.

Олинган натижалар баъзи маҳсулотлар нархида пасайиш кузатилганини, айримларида эса нархнинг ошганлигини кўрсатди. Бир қатор маҳсулотларнинг нархи эса ўзгаришсиз қолган.

Мониторинг натижаларига кўра, 6 номдаги озиқ-овқат маҳсулоти минимал нархлари пасайган. Хусусан, картошканинг минимал нархи 19,8 фоиз, сариқ пиёзники 10,3 фоиз, қизил сабзиники 3,4 фоиз, тухумники 2,1 фоиз, бананники 0,9 фоиз, кунгабоқар ёғиники 0,6 фоиз пасайган.

7 номдаги маҳсулот бўйича минимал нархлар ошган. Айниқса, помидор нархида энг катта ўсиш қайд этилди. Бу мавсумий омил билан боғлиқ. Пасайишнинг асосий сабаби бозор ҳолати ва импорт билан боғлиқ омиллар ҳисобланади.

8 номдаги маҳсулотнинг энг паст нархлари ўзгаришсиз қолган. Булар -  буғдой уни, гуруч, макарон, оқбош карам, олма, товуқ гўшти (филе), сут ва шакардир.

Аввалроқ, февраль ойида йиллик инфляция 10 фоиздан ошгани хабар берилган эди.